भारताला सध्या अमेरिकेच्या सल्ल्याची गरज नाही. आम्ही आपले २६ निष्पाप लोक गमावले आहेत. अमेरिका स्वतःच्या हितासाठी विधाने करेल. मग ती अमेरिकेचे उपराष्ट्रपती वेन्स असोत, संरक्षणमंत्री पीट हेगसेथ असोत किंवा परराष्ट्रमंत्री मार्को रुबियो असोत. अमेरिकेसाठी, आर्थिक हित नेहमीच प्रथम असते. पहलगाम हल्ल्यानंतर भारतातील लोकांत संताप आहे. लोकांना न्याय हवा हे नेतृत्वाने समजून घ्यावे.

पाक लष्करप्रमुख असीम मुनीर यांची गोळाबेरीज पहा… भारताविरुद्ध द्वेषपूर्ण भाषणानंतर त्यांच्याकडून एकही विधान आलेले नाही. जर आपल्याला पाकला धडा शिकवायचा असेल तर आपल्याला त्यांच्या सैन्याला सडेतोड उत्तर द्यावे लागेल. सध्या भारतासमोर असा पर्याय आहे जो पाकिस्तानला गुडघे टेकायला लावेल. पहिला हल्ला पीओकेतील (पाकव्याप्त काश्मीर) दहशतवादी तळ हाजी पीरवर व्हायला हवा. हा पाकिस्तान पुरस्कृत दहशतवादाचा अंगठा आहे. जर तो कापला तर पाकिस्तान अपंग होईल. हाजी पीर हे धोरणात्मक आणि सामरिक दृष्टिकोनातून खूप महत्वाचे आहे. १९६५ च्या युद्धानंतर भारताने ते ताब्यात घेतले, परंतु चंबच्या बदल्यात ते पाकला परत करणे ही एक धोरणात्मक चूक होती. नंतर ते दहशतवाद्यांचा अड्डा बनले. काश्मीरमध्ये दहशत पसरवण्यासाठी पाकिस्तानी हँडलर हाजी पीरचा वापर लाँचिंग पॅड म्हणून करतात. लष्कर आणि जैशचे येथे दहशतवादी लाँचिंग पॅडही आहेत, हे पुराव्यांसह सिद्ध झाले आहे. यावर कारवाई करणे भारतासाठी धोरणात्मकदृष्ट्या फायदेशीर ठरेल. हाजी पीर ताब्यात घेऊन भारत पीर पंजाल टेकड्यांच्या दक्षिणेकडील ज्या भागातून दहशतवादी भारतात घुसखोरी करतात त्या भागातून आयएसआयची पुरवठा लाइन तोडेल. पहलगाम हल्ल्यातील दहशतवाद्यांनी याच मार्गाने घुसखोरी केली होती. पाकिस्तानने ‘युद्धबंदी रेषा’ म्हणून संबोधलेली नियंत्रण रेषा भारताने आपल्या बाजूने बदलली पाहिजे.

पहलगामच्या गुन्हेगारांना पकडण्यात पाकने भारताची मदत करावी : वेन्स

पहलगाममधील गुन्हेगारांना पकडण्यासाठी पाकने भारताला मदत करावी, असे अमेरिकेचे उपराष्ट्राध्यक्ष जेडी वेन्स यांनी म्हटले. ते म्हणाले, भारत दहशतवादी हल्ल्याला प्रत्युत्तर म्हणून अशी कोणतीही कारवाई करणार नाही ज्यामुळे मोठा प्रादेशिक तणाव निर्माण होऊ शकतो. भारत आणि पाकमधील अलीकडच्या काळातील तणावाच्या घटनांबद्दल त्यांना चिंता वाटत असल्याचे वेन्स यांनी एका टीव्ही मुलाखतीत सांगितले.

एलओसीवर पाककडून गोळीबार, भारताचे चोख प्रत्युत्तर

गुरुवारी रात्री पाकिस्तानने सलग आठव्या दिवशी नियंत्रण रेषेवर शस्त्रसंधीचे उल्लंघन करत गोळीबार केला. पूंछ, कुपवाडा, बारामुल्ला, नौशेरा व अखनूर सेक्टरमधील गोळीबाराला भारतीय सैन्याने चोख प्रत्युत्तर दिले

पाकिस्तानमध्ये अजूनही भीतीचे वातावरण आहे. गुरुवारी रात्रभर, पाकिस्तानी लढाऊ विमाने इस्लामाबाद, लाहोर व रावळपिंडीच्या आकाशात उडत होती. रात्री हल्ला होण्याची भीती लोकांत होती. सूत्रांच्या माहितीनुसार, पाकने आता अफगाणिस्तानच्या सीमेवरील आपले अनेक स्क्वॉड्रन भारताच्या सीमेजवळ तैनात केले. यामध्ये चीनमध्ये बनवलेल्या जे-१६ आणि जे-४७ लढाऊ विमानांचा समावेश आहे. सैन्यालाही काश्मीर आघाडीवर हलवले आहे. हल्ल्याच्या भीतीमुळे पीओकेमधील जवळजवळ सर्व मदरसे आधीच रिकामे केले आले आहेत. या भागात पाकिस्तानी सैन्याची लष्करी वाहनांसह गस्तही सुरू आहे.