मुळशी (दि.19) : मुळशी तालुक्यात गेल्या २४ तासांपासून सुरू असलेल्या संततधार पावसामुळे जनजीवन विस्कळित झाले असून नद्या, ओढे आणि नाल्यांना पूर आला आहे. मुळा, मुठा आणि वळकी नद्यांसह लहान-मोठ्या ओढ्यांनी धोक्याची पातळी ओलांडली असून अनेक रस्ते आणि पूल पाण्याखाली गेले आहेत.
घोटावडे, रिहे खोरे, पिरंगुट, मुठा खोरे आणि लवासा परिसरात पावसाचे जोरदार लोट वाहत असून रस्त्यांवरून नद्यासारखे प्रवाह निर्माण झाले आहेत. मुळा नदी दुथडी भरून वाहत असल्याने लवळे, भरे, चांदे, नांदे आणि माण परिसरातील कृषीपंप पाण्यात बुडाले आहेत.
लवळे-भरे रस्त्यावरील कळमकरवस्ती येथील पुलावरून पाणी वाहत असल्याने हा रस्ता वाहतुकीसाठी बंद करण्यात आला आहे. घोटावडेतील शेळकेवाडी ते माण या रस्त्यावरून ओढा वाहत असून पाणी घरांमध्ये आणि दुकानांमध्ये घुसल्याचे स्थानिक भाजप पदाधिकारी रामचंद्र देवकर यांनी सांगितले.
पुणे-कोलाड महामार्गावरील घोटावडे फाटा येथे पाणी साचल्याने तळ्याचे स्वरूप प्राप्त झाले असून वाहतूक अत्यंत मंद गतीने सुरू आहे. कासार आंबोली परिसरातील सुतारवाडी ते शिंदेवाडी या रस्त्यालाही ओढ्याचे स्वरूप आले आहे. पाण्याच्या लाटा रस्त्यावर धडकत असल्याने वाहनचालकांची कसरत सुरू असल्याची माहिती माजी सरपंच गणेश सुतार यांनी दिली.
दरम्यान, उरवडे मुकाईवाडी रस्त्यावर चार ठिकाणी मोऱ्यांमधून पाणी ओसंडून वाहत असल्याने वाहतुकीस अडथळा निर्माण झाला आहे. या परिस्थितीबाबत पिरंगुटचे माजी ग्रामपंचायत सदस्य भानुदास गोळे यांनी चिंता व्यक्त केली आहे.
पावसामुळे निर्माण झालेली परिस्थिती लक्षात घेता प्रशासन आणि स्थानिक नागरिकांकडून खबरदारीचे आवाहन करण्यात येत आहे.
