येथील विमवि रोडवरील सौरभ गृहनिर्माण संस्थेतर्फे आयोजित राम जन्मोत्सव कार्यक्रमात ‘संत दर्शन सोहळा’ हा आगळावेगळा कार्यक्रम पार पडला. दोन तास चाललेल्या या सोहळ्यादरम्यान प्रेक्षक मंत्रमुग्ध झाले होते.
?
या कार्यक्रमाच्या माध्यमातून प्रेक्षकांना संत गजानन महाराज, स्वामी समर्थ, राष्ट्रसंत तुकडोजी महाराज आणि संत गाडगेबाबा यांचे दर्शन घडले. या सर्व संतांना जणू आपण प्रत्यक्षच बघत आहोत, एवढे प्रभावशाली सादरीकरण या कार्यक्रमातून करण्यात आले. प्रभू राम, सिता, लव-कुश हेही या सोहळ्याचे आकर्षण ठरले. कलावंत प्रा. एम. टी. नाना देशमुख हे गजानन महाराजांच्या रूपात पुढे आले. त्यानंतर ‘भिऊ नकोस मी तुझ्या पाठीशी आहे’, सांगणारे स्वामी समर्थही त्यांनीच साकारले.
त्यानंतर प्रेक्षागृहात दणदणीत व खणखणीत खंजिरी गर्जू लागली आणि वसंतराव साठे हे गृहस्थ राष्ट्रसंत तुकडोजी महाराजांच्या रुपात अवतरले. ‘मनी नाही भाव म्हणे देवा मले पाव’ हे भजन गात त्यांनी प्रवेश केला. प्रशांत उर्फ पिंटू ठाकरे यांनी त्यांना खंजिरीवर साथ दिली. त्यानंतर नमुना सार्वजनिक मंडळाचे माणिकभाऊ आणि अमरावतीच्या नाट्य वर्तुळातील नाना या नावाने ओळखल्या जाणाऱ्या प्रा. एम. टी. देशमुख यांनी संत गाडगेबाबा हे चौथे संतदर्शन सादर केले. तर दुसरीकडे आपल्या दमदार आवाजाने आणि प्रसंगानुरूप निवेदनाद्वारे लोकांपर्यंत पोहोचवण्याचे काम प्रसिद्ध नाट्यकर्मी व निवेदक गजानन उर्फ तात्या संगेकर यांनी केले. प्रारंभी नूपूर कला अकादमीचे प्रकाश मेश्राम यांनी लोकनृत्य, कव्वाली, दिंडी व शास्त्रीय नृत्य या प्रकारातून वातावरण निर्मिती केली. अभिरुची कला व क्रीडा मंदिर आणि नूपूर कला अकादमीच्या कलावंतांसह डॉ. भोजराज चौधरी, सुरेश बारसे, विशाल तराळ, ॲड. चंदू कराळे, परांजपे, विराग जाखड, डॉ. शाम देशमुख, आकाश पांडे तसेच श्रीराम जन्मोत्सव समितीचे राजाभाऊ बहाळे, डॉ. पाटणकर, प्रकाश बहाळे, प्रदीप शेटिये, राजाभाऊ देशमुख, डॉ. सावन देशमुख, प्रदीप कुळकर्णी, बाबुराव चौखंडे, शिवा काळे यांनी कार्यक्रमासाठी परिश्रम घेतले.
