.

प्राथमिक माहितीनुसार, या जवानाने ड्युटीवर असताना स्वतःच्याच ‘सर्व्हिस रायफल’मधून गोळी झाडून आपली जीवनयात्रा संपवली. अत्यंत कडेकोट सुरक्षा व्यवस्था असलेल्या ठिकाणी या जवानाने हे टोकाचे पाऊल नेमक्या कोणत्या नैराश्यातून किंवा कारणातून उचलले, हे अद्याप स्पष्ट होऊ शकलेले नाही. या घटनेची माहिती मिळताच वरिष्ठ अधिकाऱ्यांनी घटनास्थळी धाव घेतली असून, पोलिस या प्रकरणाचा सविस्तर तपास करत आहेत.

‘SRPF ग्रुप 16, कोल्हापूर’ तुकडीचे जवान होते

राजभवनात स्वतःवर गोळी झाडून आत्महत्या करणाऱ्या एसआरपीएफ (SRPF) जवानाचे नाव कौस्तुभ सांगळे असे असून, ते पोलीस अंमलदार म्हणून कार्यरत होते. सांगळे हे मूळचे ‘एसआरपीएफ ग्रुप 16, कोल्हापूर’ येथील तुकडीचे जवान होते आणि सध्या त्यांची विशेष नियुक्ती मुंबईतील राजभवनाच्या सुरक्षेसाठी करण्यात आली होती. आज ते राजभवन परिसरातील ‘लोक भवन’ येथे आपल्या गार्ड ड्युटीवर तैनात होते.

गार्ड ड्युटी बजावत असतानाच अचानक त्यांनी स्वतःच्या सर्व्हिस रायफलमधून स्वतःवर गोळी झाडून घेतली. या गोळीबाराचा प्रचंड आवाज ऐकताच परिसरातील इतर सुरक्षा कर्मचाऱ्यांनी तातडीने त्या दिशेने धाव घेतली. मात्र, तोपर्यंत कौस्तुभ सांगळे यांचा जागीच दुर्दैवी मृत्यू झाला होता. या अनपेक्षित आणि धक्कादायक घटनेमुळे अत्यंत सुरक्षित मानल्या जाणाऱ्या राजभवन परिसरात मोठी खळबळ उडाली असून, तणावाचे वातावरण निर्माण झाले आहे.

पोलिसांकडून तपास सुरू

घटनेची माहिती मिळताच मलबार हिल पोलिस ठाण्यातील वरिष्ठ अधिकाऱ्यांसह पोलिसांचा मोठा फौजफाटा तात्काळ राजभवनात दाखल झाला. पोलिसांनी तातडीने घटनास्थळाचा पंचनामा करून जवानाचा मृतदेह ताब्यात घेतला असून, तो पुढील वैद्यकीय प्रक्रियेसाठी आणि शवविच्छेदनासाठी रुग्णालयात पाठवण्यात आला आहे.

एसआरपीएफ जवान कौस्तुभ सांगळे यांनी कौटुंबिक वादातून, नैराश्यातून की अन्य कोणत्या मानसिक तणावातून आत्महत्येसारखे टोकाचे पाऊल उचलले, याचा पोलिसांकडून सध्या कसून तपास केला जात आहे. प्राथमिक तपासात घटनास्थळावरून कोणतीही ‘सुसाईड नोट’ अद्याप हाती लागलेली नाही. या प्रकरणाच्या अधिक सखोल चौकशीसाठी वरिष्ठ पोलिस अधिकारी राजभवनात तैनात असलेल्या इतर सहकाऱ्यांचे आणि जवानांचे जबाब नोंदवून घेत असून, मलबार हिल पोलिसांकडून या प्रकरणाचा पुढील तपास सुरू आहे.