पुणे (बालेवाडी) : बालेवाडी येथे आयोजित करण्यात आलेल्या तीन दिवसीय “योगोपचार” आरोग्य शिबिराला पुणेकरांचा उत्स्फूर्त प्रतिसाद लाभला. भाजपचे शहर चिटणीस लहू बालवडकर यांच्या पुढाकाराने लहू बालवडकर सोशल वेलफेअर, जनार्दन स्वामी योगाभ्यासी मंडळ, नागपूर आणि गेनबा सोपानराव मोझे कॉलेज ऑफ इंजिनिअरिंग, बालेवाडी यांच्या संयुक्त विद्यमाने या शिबिराचे आयोजन करण्यात आले होते.
शिबिराच्या दरम्यान दररोज सुमारे २०० ते २५० नागरिकांनी उपस्थिती लावली. त्यामुळे एकूणच ७०० हून अधिक नागरिकांनी या उपक्रमात सहभाग घेतला. योगगुरु व योगोपचार तज्ज्ञ राम खांडवे गुरुजी यांनी शिबिराचे नेतृत्व केले, तर डॉ. श्री. अनिरुद्ध गुर्जलवार यांनी विशेष मार्गदर्शन केले.
पाठीच्या मणक्याचे विकार, मधुमेह, उच्च रक्तदाब अशा आजारांवर योगाच्या माध्यमातून उपचार पद्धती आणि जीवनशैलीतील बदल यावर सखोल मार्गदर्शन करण्यात आले. सहभागी नागरिकांनी उपचारानंतरच्या अनुभवांबाबत समाधान व्यक्त करत आयोजकांचे मन:पूर्वक आभार मानले.
शिबिरासाठी कोणतेही शुल्क न आकारल्यामुळे विविध वयोगटातील नागरिकांनी उत्साहाने सहभाग घेतला. विशेषतः युवक, विद्यार्थी, महिला व ज्येष्ठ नागरिकांचा सहभाग लक्षणीय ठरला.
या उपक्रमामागे लहू गजानन बालवडकर व योगतज्ञ प्रमोद जोशी यांचे विशेष योगदान असून, “आरोग्यासाठी योग ही काळाची गरज आहे. पुढील काळात अशाच उपक्रमांचे आयोजन सातत्याने करण्यात येईल,” अशी माहिती आयोजकांकडून देण्यात आली.
