?

पोलिसांनी दिलेल्या माहितीनुसार, आखाडा बाळापूर पोलिस ठाण्यांतर्गत एका गावात पिडीत मुलगी तिच्या दोन्ही डोळ्यांनी अंध असलेल्या आई, वडिल व दोन लहान भावांसह एका खोलीत राहते. वडिल रोजमजूरी करून कुटुंबाचा उदरनिर्वाह करतात. सदर मुलगी सहावी वर्गात शिक्षण घेते. डिसेंबर महिन्यात पिडीत अल्पवयीन मुलगी कुटुंबासह घरात झोपली असतांना तिच्या पित्यानेच तिच्यावर जबरदस्तीने अत्याचार केला. मात्र सदर मुलीने मारहाणीच्या भितीने सदर प्रकार कोणालाही सांगितला नाही.

मात्र मागील काही दिवसांत त्या मुलीच्या पोटात दुखत असल्याने तिच्या कुटुंबियांनी तिला थेट नांदेड येथे शासकिय रुग्णालयात उपचारासाठी दाखल केले. मात्र तिच्या आरोग्य तपासणी मध्ये सदर मुलगी गरोदर असल्याचे दिसून आले. सदर प्रकरण वेगळेच दिसून येत असल्याने वैद्यकिय अधिकाऱ्यांनी सदर मुलीकडे विचारणा केल्यानंतर तिने डॉक्टरांना घराचा पत्ता व इतर माहिती दिली.

त्यावरून वैद्यकिय अधिकाऱ्यांनी तातडीने आखाडा बाळापूर पोलिसांना माहिती दिली. पोलिस निरीक्षक विष्णुकांत गुठ्ठे, सहाय्यक पोलिस निरीक्षक ज्ञानेश्‍वर बसवंते, महिला पोलिस उपनिरीक्षक श्रीदेवी वग्गे यांच्या पथकाने तातडीने नांदेड येथे जाऊन त्या मुलीचा जवाब नोंदविला. यावेळी मुलीने तिच्या पित्यानेच अत्याचार केल्याचा जवाब नोंदविला. यावरून पोलिसांनी तातडीने पोक्सो कायद्यांतर्गत गुन्हा दाखल केला आहे. घटनेचे गांभीर्य लक्षात घेऊन पोलिसांनी आरोपी पित्याला अटक केली आहे. पोलिसांनी त्याची अधिक चौकशी सुरु केली आहे.