?

उद्धव ठाकरे काही दिवसांपूर्वी सुट्ट्या घालवण्यासाठी परदेशात गेले होते. ते नुकतेच परतलेत. त्यांच्या या परदेश दौऱ्यावरून एकनाथ शिंदे यांनी अमरावती येथे आयोजित शिवसैनिकांच्या मेळाव्यात त्यांच्यावर निशाणा साधला आहे. या मेळाव्यात ठाकरे गटाच्या अनेक स्थानिक नेत्यांनी शिंदे गटात प्रवेश केला. यावेळी बोलताना शिंदे ठाकरेंवर टीका करत म्हणाले, वंदनीय हिंदुहृदयसम्राट बाळासाहेब ठाकरे सांगायचे कार्यकर्ता घरात नाही तर लोकांच्या दारात शोभून दिसतो. त्याप्रमाणे शिवसेनेचे कार्यकर्ते लोकांच्या दारात काम करत आहेत. लोक काम करणाऱ्याला निवडून देतात, घरात बसणाऱ्याला नाही. मात्र आता नेते युरोपात आणि कार्यकर्ते कोमात, अशी उबाठाची अवस्था झाली आहे.

काही लोक घराबाहेर पडले तर थेट परदेशात जातात

माजी आमदार दिवंगत संजय बंड हे सच्चे शिवसैनिक होते. पण त्यांना काय मिळाले. एखाद्या कार्यकर्त्याला धुळीस कसे मिळवायचे याचे क्लासेस लावायचे असतील, तर मुंबईतील बांद्रा येथे त्याचे एकच ठिकाण आहे. आमची कुठेही शाखा नाही. आम्ही बाळासाहेबांचे विचार घेऊन पुढे जात आहोत. आम्ही शासन आपल्या दारी ही योजना घेऊन आलो. 5 कोटी लोकांनी त्याचा लाभ घेतला. पण काही लोक घराच्या बाहेरच पडत नाही आणि पडले तर थेट परदेशात जातात, असेही ते यावेळी उद्धव यांना उपरोधिक टोला हाणताना म्हणाले.

मोदी पाकचे नामोनिशाण मिटवून टाकतील

एकनाथ शिंदे यांनी यावेळी भारत-पाक तणावावरही भाष्य केले. पहलगाममध्ये दहशतवाद्यांनी केलेल्या हल्ल्यानंतर पंतप्रधान नरेंद्र मोदीजी यांनी एअर स्ट्राईक करत पाकिस्तानला जशास तसे उत्तर दिले. मात्र त्यानंतरही भारतीय हद्दीत क्षेपणास्त्रे डागून आगळीक करण्याचा प्रयत्न पाकिस्तानने केल्यास त्याला जशास तसे उत्तर दिले जाईल. भारतीय सैन्यदल त्यांना असे प्रत्युत्तर देईल की पाकिस्तानचा नामोनिशाण जगाच्या नकाशावरून पुसला जाईल, असे ते म्हणाले.

हे ही वाचा…