?

पुलंचा २५ वा स्मृतिदिन व सुनीताबाईंच्या जन्मदिनाचे औचित्य साधून, करोना काळात बंद पडलेला ‘ग्लोबल पुलोत्सव’ पुन्हा सुरु झाला आहे. या ‘ग्लोबल पुलोत्सवा’ निमित्त बालगंधर्व रंगमंदिरात ब्रेल लिपीव्दारे दृष्टिहीनांना चित्रकलेचा आनंद देणारे प्रसिध्द चित्रकार चिंतामणी हसबनीस यांना ज्येष्ठ सामाजिक कार्यकर्ते पद्मश्री गिरीश प्रभुणे यांच्या हस्ते पुलोत्सव कृतज्ञता सन्मान प्रदान करण्यात आला, त्यावेळी प्रभुणे बोलत होते.

यावेळी चिंतामणी हसबनीस यांचे सप्रयोग व्याख्यान झाले आणि त्यांच्याशी डॉ. मंदार परांजपे यांनी संवाद साधला.

यावेळी व्यासपीठावर महोत्सवाचे स्वागताध्यक्ष कोहिनूर ग्रुपचे चेअरमन कृष्णकुमार गोयल, लोकमान्य मल्टिर्पपज को-ऑप. क्रेडीट सोसायटी लि.चे सुशील जाधव, महोत्सव संयोजक वीरेंद्र चित्राव आणि सतीश जकातदार आदी मान्यवर उपस्थित होते.

पद्मश्री गिरीश प्रभुणे म्हणाले की, आपल्या पूर्वजांनी अजिंठासारख्या अंधाऱ्या गुहांमध्ये जाऊन जी चित्रे आणि शिल्पे रेखाटली ते पाहून अचंबित व्हायला होते. आजही ती चित्रे पाहिल्यानंतर आपल्या भावना उचंबळून येतात. चित्र पाहण्याची एक भाषा आणि एक लिपी असते. पाहणारा प्रत्येक जण स्वतःची लिपी आणि भाषेनुसार त्या चित्राशी बोलत असतो. या अर्थाने ते बहुभाषिक असतात. हसबनीस यांनी दिव्यांगांना समजेल अशी चित्रांची भाषा विकसीत केली. दृष्टिहीनांना देखील चित्रांचा आनंद घेण्याचा अधिकार आहे, या भावनेतून हसबनीस यांनी विकसीत केलेली ही चित्रे म्हणजे एक वैज्ञानिक शोध आहे. दृतगतीवर गतीने वाहणारे आपले हे गतिमान जीवन थोडे थांबून चित्रांचा आनंद घ्यावा, असे सुचवते. जलदगतीने धावणारा हा समाज अंध झाला आहे. कला लुप्त होत असून डोळसांनी देखील चित्रे समजून घेतली पाहिजे. प्रसिध्दी माध्यमांव्दारे येणाऱ्या हिंसा, बलात्कार यांच्या बातम्यांच्या भडीमारामुळे समृध्द संस्कृती आणि कलेचा आपल्याला विसर पडत आहे.

यानंतर झालेल्या प्रकट मुलाखतीत पुरस्काराला उत्तर देताना चिंतामणी हसबनीस म्हणाले की, आज मिळालेल्या पुरस्कारामुळे माझ्या मेहनतीचे चीज होत आहे, याचे समाधान मिळत आहे. पुलंनी ज्या पध्दतीने त्यांच्या साहित्य लेखनातून विनोदाच्या माध्यमातून भाष्य केले, त्याच पावलावर पाऊल ठेवत ‘क्लोज आईज अँड ओपन माईंड’ या चित्र मालिकेव्दारे दृष्टिहीनांना चित्रांचा अनुभव देण्याचे माझे स्वप्न पूर्ण झाले.