मुळशी (खारवडे) : मुळशी तालुक्यातील खारवडे येथे श्री म्हसोबा व श्री भैरवनाथ यांचा वार्षिक उत्सव चैत्र शुद्ध पौर्णिमा, शुक्रवार दि. १२ एप्रिल रोजी साजरा होणार आहे. या निमित्ताने देवस्थान ट्रस्टच्या वतीने दोन दिवस विविध धार्मिक व सांस्कृतिक कार्यक्रमांचे आयोजन करण्यात आले असून, सध्या परिसरात उत्सवाची जोरदार तयारी सुरू आहे.
उत्सवानिमित्त 11 एप्रिल रोजी दीपोत्सव, भजन, भक्ती शक्ती संगम अभंगवाणी व शौर्यगाथा आदी कार्यक्रमांचे आयोजन करण्यात आले आहे. तर 12 एप्रिल रोजी श्री हनुमान जन्मोत्सव, श्री मसोबा देवास महरुद्राभिषेक, पुरस्कार वितरण व चांदीचा महिरप अर्पण, अहवाल प्रकाशन तसेच श्री म्हसोबा देवाचा छबिना, पालखी सोहळा व मिरवणुकीचे आयोजन करण्यात आले आहे.
या उत्सवाच्या निमित्ताने श्री जगद्गुरु शंकराचार्य विद्यानृसिंहभारती महाराज (करवीर पीठ, कोल्हापूर), भावार्थ देखणे महाराज (प्रमुख, आळंदी देवस्थान), राष्ट्रसंत भाऊ महाराज परांडे, शिवाजी महाराज मोरे (विश्वस्त, विठ्ठल-रुक्मिणी मंदिर, पंढरपूर), गणेश महाराज कार्ले, डॉ. मानसिंग साबळे (वैद्यकीय अधिकारी, ससून) यांच्या प्रमुख उपस्थितीत ज्ञानेश्वर बोडके (संस्थापक, अभिनव फार्मर्स क्लब, पुणे) यांना जीवन गौरव पुरस्काराने सन्मानित करण्यात येणार आहे. तसेच संतोष विठ्ठल भाडळे यांच्या तर्फे श्री म्हसोबा देवास चांदीची महिरप अर्पण करण्यात येणार आहे. कार्यक्रमास “स्वराज्यजननी येसूबाई” या मालिकेतील प्रमुख अभिनेत्री प्राजक्ता गायकवाड यांची विशेष उपस्थिती राहणार आहे.
या सर्व धार्मिक-सांस्कृतिक कार्यक्रमांमध्ये ग्रामस्थ व भाविकांनी मोठ्या संख्येने सहभागी व्हावे, असे आवाहन श्री म्हसोबा भैरवनाथ काळुबाई शंकर देवस्थान ट्रस्ट, खारवडे व ग्रामस्थांनी केले आहे.
