मुळशी : मावळ आणि मुळशी तालुक्याला जोडणाऱ्या पिंपळोली (ता. मुळशी) येथील महत्त्वपूर्ण रस्त्याच्या कामाला अखेर गती मिळाल्याने स्थानिक ग्रामस्थांमध्ये आनंदाचे वातावरण आहे. या रस्त्यामुळे दोन्ही तालुक्यांमधील दळणवळण सुकर होणार असून, गेल्या अनेक वर्षांपासूनची नागरिकांची मागणी पूर्णत्वास येत असल्याने समाधान व्यक्त करण्यात येत आहे.
पंतप्रधान सडक योजनेअंतर्गत या रस्त्याचे काम होत असून, यासाठी खासदार सुप्रिया सुळे यांच्या पाठपुराव्यामुळे सुमारे ६.५ कोटी रुपयांचा निधी मंजूर करण्यात आला आहे. या रस्त्याच्या कामासाठी पिंपळोलीचे माजी सरपंच बाबाजी शेळके यांनी सातत्याने पाठपुरावा केला होता. तसेच जिल्हा परिषदेचे तत्कालीन उपाध्यक्ष रणजित शिवतरे आणि तत्कालीन जिल्हा परिषद सदस्य शंकर मांडेकर यांनीही या रस्त्याच्या मंजुरीसाठी प्रयत्न केले होते.
मुळशी तालुक्यातील रिहे खोऱ्यातून मावळ तालुक्यातील पाचाणे, पुसाणे, तसेच इतर गावांमध्ये जाण्यासाठी नागरिकांना यापूर्वी सुमारे ३५ किलोमीटरचा वळसा घालावा लागत होता. मात्र, या नव्या रस्त्यामुळे प्रवासात मोठी बचत होणार असून, मावळ व मुळशीतील कुटुंबीयांच्या सोयरिक, धार्मिक व सांस्कृतिक कार्यक्रमांमध्ये उपस्थित राहणे अधिक सुलभ होणार आहे.
या रस्त्याचा पूर्वीचा स्वरूप कच्चा होता आणि खिंडीतून जाणारा असल्याने पावसाळ्यात दरवर्षी रस्ता वाहून जात असे, त्यामुळे स्थानिकांना मोठ्या अडचणींना सामोरे जावे लागत होते. विशेष म्हणजे गेली दहा वर्षे सलग महाशिवरात्रीच्या दिवशी बाबाजी शेळके स्वतःच्या खर्चाने या रस्त्याची तात्पुरती दुरुस्ती करत होते.
सध्या या रस्त्याचे काम वेगाने सुरू असून, ग्रामस्थ व लोकप्रतिनिधी कामाच्या ठिकाणी प्रत्यक्ष उभे राहून कामाची पाहणी करत आहेत. येत्या काही महिन्यांत हा रस्ता पूर्णत्वास जाईल अशी अपेक्षा असून, स्थानिक नागरिकांसाठी ही मोठी दिलासादायक बाब ठरणार आहे.
