.
सरत्या वर्षाला निरोप द्या, नववर्षाचे स्वागत करा, पण दारू ऐवजी दूध प्या. असा प्रचार प्रसार करीत अंधश्रद्धा निर्मूलन समितीच्या जामनेर शाखेतर्फे बस स्थानकाजवळ दुधाचे वाटप करण्यात आले. यावेळी अंधश्रद्धा निर्मूलन समितीसाठी लिखाण केलेली दिग्गज लेखकांच्या पुस्तकांचा स्टॉल लावण्यात आला होता.
आज घडीला जीवनात अमुलाग्र बदल झाला आहे. आजचे तरुण संस्कार, संस्कृती विसरून पाश्चात्त्य देशांचे अनुकरण करतात. त्यातच वर्षाची अखेर म्हणजे ३१ डिसेंबर (थर्टी फर्स्ट) म्हणून दारू पिऊन किंवा मांसाहार करून साजरा करण्याचा जणू रिवाजच सुरू झाला आहे. मात्र यामुळे तरुणाई देशोधडीला लागला असून असंख्य व्यसनाधीन तरुणांना जीव गमवावा लागला आहे. त्यामुळे सरत्या वर्षाला निरोप देताना व नववर्षाचे स्वागत करताना ‘ दारू नको दूध प्या, असे आवाहन करत दुधाचे वाटप करण्यात आले. यावेळी अंनि सचे जिल्हा उपाध्यक्ष नाना लामखेडे, तालुका उपाध्यक्ष आबासाहेब पाटील, जिल्हा कार्याध्यक्ष प्रल्हाद बोऱ्हाडे, जामनेर शाखा कार्याध्यक्ष बी.आर. पाटील आदी उपस्थित होते.
श्रद्धा असावी मात्र अंधश्रद्धा असू नये. याच अंधश्रद्धेतून अनेक कुटुंब उध्वस्त झाली आहेत. त्यासाठी सत्यशोधकांचे मार्गदर्शन लोकांसमोर जावे म्हणून प्रयत्न आहेत. तसेच अवयव दाना बाबत जनजागृती करून प्रचार प्रसार करून अवयव दान करू इच्छिणाऱ्यांचे जामनेरातील समितीने अर्ज भरून घेतलं.
^तरुण पिढी पाश्चात्य शैली अनुकरणाच्या नावाखाली अंधानुकरण करत आहे. दूध पिऊन पैलवान होणाऱ्यांचा आदर्श न घेता दारू पिऊन झिंगाणारे आदर्श वाटू लागले आहेत. म्हणून आम्ही दारू नको दूध प्या असा संकल्प राबवत आहोत. – नाना लामखेडे






















