रायगड जिल्ह्यातील खोपोली शहर आज सकाळी घडलेल्या एका भीषण घटनेमुळे हादरून गेलं आहे. खोपोली नगरपालिकेच्या शिंदे गटाच्या नवनिर्वाचित नगरसेविका मानसी काळोखे यांच्या पती मंगेश काळोखे यांची 26 डिसेंबर रोजी सकाळी सुमारे सात वाजताच्या सुमारास अत्यंत निर्दयपणे
.
आज सकाळी मंगेश काळोखे हे नेहमीप्रमाणे आपल्या मुलाला शाळेत सोडण्यासाठी घराबाहेर पडले होते. मुलाला सुरक्षितपणे शाळेत सोडून ते घरी परतत असतानाच दबा धरून बसलेल्या काही अज्ञात व्यक्तींनी त्यांच्यावर अचानक हल्ला चढवला. प्रत्यक्षदर्शींनी दिलेल्या माहितीनुसार, हल्लेखोर काळ्या रंगाच्या वाहनातून घटनास्थळी आले होते. त्यांनी तोंडाला रुमाल किंवा कापड बांधले असल्यामुळे त्यांची ओळख पटू शकली नाही. काही क्षणांतच अत्यंत क्रूरपणे हल्ला करून आरोपी घटनास्थळावरून फरार झाले. सकाळची वेळ आणि वर्दळ असतानाही इतक्या निर्भयपणे हा हल्ला करण्यात आल्याने नागरिकांमध्ये भीतीचं वातावरण निर्माण झालं आहे.
घटनेची माहिती मिळताच खोपोली पोलिसांनी तात्काळ घटनास्थळी धाव घेतली आणि परिसराची पाहणी सुरू केली. पोलिसांनी घटनास्थळावरील पुरावे गोळा करत हल्लेखोरांचा शोध सुरू केला आहे. प्रत्यक्षदर्शींचे जबाब नोंदवले जात असून, काळ्या रंगाच्या वाहनाचा माग काढण्यासाठी सीसीटीव्ही फुटेज तपासले जात आहेत. मंगेश काळोखे यांच्या हत्येमागे नेमकं कारण काय, कोणाचा यात सहभाग आहे, याबाबत पोलिस सर्व शक्य त्या कोनातून तपास करत आहेत. मात्र सध्या तरी आरोपी फरार असून, त्यांना लवकरात लवकर अटक करण्याचं आव्हान पोलिसांसमोर उभं आहे. हल्लेखोर पकडल्यानंतरच या घटनेमागचं खरं सत्य समोर येईल, अशी माहिती पोलिसांकडून देण्यात आली आहे.
पराभव राष्ट्रवादीच्या जिव्हारी लागल्यामुळेच ही हत्या – भरत गोगावले
या घटनेनंतर राजकीय वातावरण अधिक तापलं असून मंत्री आणि शिवसेना शिंदे गटाचे आमदार भरत गोगावले यांनी थेट राष्ट्रवादी काँग्रेसवर गंभीर आरोप केले आहेत. खोपोली नगरपालिकेच्या निवडणुकीतील पराभव राष्ट्रवादीच्या जिव्हारी लागल्यामुळेच ही हत्या घडवून आणण्यात आली असावी, असा धक्कादायक दावा त्यांनी केला आहे. 21 तारखेला निवडणुकांचे निकाल लागल्यानंतर अवघ्या काही दिवसांतच ही हत्या झाली, याकडे लक्ष वेधत गोगावले यांनी हा सगळा प्रकार राजकीय आकसातून घडवण्यात आल्याचा संशय व्यक्त केला आहे. ही अत्यंत दुर्दैवी घटना असून यामागे राष्ट्रवादीच्या कार्यकर्त्यांचा हात असण्याची शक्यता त्यांनी बोलून दाखवली आहे. तसेच दोषींना तात्काळ अटक करून कठोर कारवाई करावी, अशी मागणीही त्यांनी केली आहे.
हिंसक घटना घडल्याने नागरिकांमध्ये भीती आणि असुरक्षिततेची भावना
दिवसाढवळ्या झालेल्या या हत्येमुळे खोपोली शहर अक्षरशः स्तब्ध झालं आहे. निवडणुकांची रणधुमाळी सुरू असताना अशा प्रकारची हिंसक घटना घडल्याने नागरिकांमध्ये भीती आणि असुरक्षिततेची भावना निर्माण झाली आहे. एका नगरसेविकेच्या पतीवर अशा पद्धतीने हल्ला होणं हे कायदा आणि सुव्यवस्थेवर मोठं प्रश्नचिन्ह निर्माण करणारं ठरत आहे. या घटनेचे पडसाद राज्याच्या राजकीय वर्तुळातही उमटले असून आरोप-प्रत्यारोपांना वेग आला आहे. मात्र सध्या हत्येमागील नेमकं कारण काय, हल्लेखोर कोण आहेत आणि त्यामागे कोणाचा हात आहे, याबाबतची खरी माहिती आरोपी अटकेत आल्यानंतरच समोर येणार आहे. तोपर्यंत खोपोली शहरात तणावपूर्ण शांतता पसरलेली आहे.






















