वरुण चक्रवर्ती टी-20 क्रमवारीत 818 रेटिंग गुणांसह भारताचा सर्वाधिक रेटिंग मिळवणारा गोलंदाज बनला आहे. बुधवारी जाहीर झालेल्या एकदिवसीय क्रमवारीत रोहित शर्मा आणि विराट कोहली अनुक्रमे पहिल्या आणि दुसऱ्या स्थानावर कायम आहेत.

34 वर्षीय वरुण या वर्षी सप्टेंबरमध्ये पहिल्यांदा गोलंदाजांच्या क्रमवारीत अव्वल स्थानी पोहोचला होता. उत्कृष्ट फॉर्ममध्ये असलेल्या वरुणने नुकत्याच दक्षिण आफ्रिकेविरुद्धच्या तिसऱ्या सामन्यात दोन बळी घेऊन भारतासाठी टी-20 मध्ये 50 बळी पूर्ण केले आणि तो ही कामगिरी करणारा दुसरा सर्वात वेगवान भारतीय गोलंदाज ठरला.

तथापि, पुरुष टी-20 आंतरराष्ट्रीयमध्ये सर्वाधिक रेटिंगचा विक्रम पाकिस्तानच्या उमर गुलच्या नावावर आहे, ज्याने 865 रेटिंग गुण मिळवले होते.

वरुणने 51 विकेट घेतल्या आहेत वरुणने आतापर्यंत 32 टी-20 आंतरराष्ट्रीय सामन्यांमध्ये 51 विकेट घेतल्या आहेत, ज्यात त्याची सर्वोत्तम कामगिरी 5/17 अशी राहिली आहे. सध्याच्या दक्षिण आफ्रिकेविरुद्धच्या टी-20 मालिकेतही त्याने तीन सामन्यांत 6 विकेट घेऊन तो सर्वाधिक विकेट घेणारा गोलंदाज ठरला आहे. गोलंदाजांच्या क्रमवारीत भारताला आणखी एक फायदा झाला आहे, जिथे अर्शदीप सिंगने चार स्थानांची झेप घेऊन 16 वे स्थान पटकावले आहे.

अभिषेक शर्मा टॉप टी-20 फलंदाज फलंदाजांच्या टी-20 क्रमवारीत अभिषेक शर्मा नंबर-1 वर कायम आहे. त्याच्या नावावर आता 909 रेटिंग गुण आहेत. तर तिलक वर्माने दोन स्थानांची झेप घेऊन चौथे स्थान पटकावले आहे आणि त्याचे 774 रेटिंग गुण झाले आहेत.

वनडे फलंदाजांची क्रमवारी: रोहित-कोहली अव्वल स्थानी वनडे फलंदाजी क्रमवारीत भारतीय फलंदाजांचे वर्चस्व कायम आहे. रोहित शर्मा अव्वल स्थानी कायम आहे, तर विराट कोहली दुसऱ्या स्थानावर आहे. याच यादीत शुभमन गिल पाचव्या आणि श्रेयस अय्यर दहाव्या स्थानावर आहेत.

ऑलराऊंडर्स रँकिंगमध्ये दुबेला फायदा ऑलराऊंडर्सच्या रँकिंगमध्ये पाकिस्तानचा सईम अयूब अव्वल स्थानी कायम आहे. तर भारतीय ऑलराऊंडर शिवम दुबेने दोन स्थानांची झेप घेत 16वे स्थान पटकावले आहे.