ऑस्ट्रेलियाचे माजी दिग्गज फलंदाज डॅमियन मार्टिन यांच्या प्रकृतीत सुधारणा झाली आहे. मेनिन्जायटिसमुळे इंड्यूस्ड कोमामध्ये असलेले 54 वर्षीय मार्टिन आता शुद्धीवर आले आहेत आणि डॉक्टरांना त्यांना लवकरच आयसीयूबाहेर हलवण्याची आशा आहे.

माजी ऑस्ट्रेलियन क्रिकेटपटू आणि त्यांचे जवळचे मित्र ॲडम गिलख्रिस्ट यांनी सांगितले की, गेल्या 48 तासांत परिस्थिती पूर्णपणे बदलली आहे. गिलख्रिस्ट यांच्या मते, मार्टिन आता बोलू लागले आहेत आणि उपचारांना चांगला प्रतिसाद देत आहेत. मार्टिन यांना 27 डिसेंबर रोजी गंभीर अवस्थेत ब्रिस्बेन येथील रुग्णालयात दाखल करण्यात आले होते. बॉक्सिंग डेच्या दिवशी मार्टिन यांची तब्येत अचानक बिघडली होती.

मार्टिन यांनी 67 कसोटी आणि 208 एकदिवसीय सामने खेळले

मार्टिनने 2006 मध्ये आंतरराष्ट्रीय क्रिकेटमधून निवृत्ती घेतली होती.

डेमियन मार्टिनने ऑस्ट्रेलियासाठी 67 कसोटी आणि 208 एकदिवसीय सामने खेळताना उत्कृष्ट फलंदाजी केली आहे. याशिवाय, ते चार टी-20 आंतरराष्ट्रीय सामन्यांमध्येही खेळले आहेत. आपल्या कारकिर्दीत मार्टिनने कसोटी क्रिकेटमध्ये 4406 धावा केल्या, तर एकदिवसीय क्रिकेटमध्ये त्याच्या नावावर 5346 धावांची नोंद आहे.

2006 मध्ये आंतरराष्ट्रीय क्रिकेटमधून निवृत्ती घेतल्यानंतरही ते क्रिकेटशी जोडलेले राहिले. मार्टिन 1999 आणि 2003 च्या विश्वचषक विजेत्या ऑस्ट्रेलियन संघातही सामील होते.

भारताविरुद्ध 2003 विश्वचषक फायनलमध्ये नाबाद 88 धावा केल्या 2003 च्या विश्वचषक फायनलमध्ये भारताविरुद्ध त्यांनी महत्त्वाची भूमिका बजावली होती. मार्टिनने 84 चेंडूंमध्ये नाबाद 88 धावा केल्या आणि कर्णधार रिकी पॉन्टिंगसोबत 234 धावांची भागीदारी केली. या भागीदारीमुळे ऑस्ट्रेलियाने 50 षटकांत 359/2 असा मोठा स्कोर उभारला होता.

मार्टिन 2006 च्या चॅम्पियन्स ट्रॉफीमध्येही ऑस्ट्रेलियासाठी सर्वाधिक धावा करणारे फलंदाज होते. त्यांनी पाच डावांमध्ये 241 धावा केल्या, ज्यात दोन अर्धशतकांचा समावेश होता.