पुणे शहरातील कोथरूड भागात एका महिलेने गुंगीचे औषध पाजून एका विवाहित तरुणावर अत्याचाराचा प्रयत्न केल्याचा आरोप समोर आला आहे. महिलेने तरुणाची खासगी छायाचित्रे प्रसारित करण्याची धमकी देऊन दोन लाख रुपयांची खंडणी मागितल्याचेही फिर्यादीत म्हटले आहे.
याबाबत एका तरुणाने कोथरूड पोलीस ठाण्यात फिर्याद दिली आहे. गुन्हा दाखल करण्यात आलेली महिला ४२ वर्षांची असून, ती कोथरूड भागात राहते. पोलिसांनी दिलेल्या माहितीनुसार, ही महिला स्वतःला वकील असल्याचे सांगत होती आणि उच्च न्यायालयात कार्यरत असल्याचे भासवत होती. तक्रारदार तरुण विवाहित असून, तो मूळचा कोल्हापूर जिल्ह्यातील चंदगडचा रहिवासी आहे.
तक्रारदार तरुण कुटुंबीयांसोबत देवदर्शनासाठी गेला असताना त्याची आरोपी महिलेशी ओळख झाली होती. महिलेने ओळख वाढवून तरुणाला आपल्या जाळ्यात ओढले. त्यानंतर तिने गुंगीचे औषध पाजून तरुणावर अत्याचाराचा प्रयत्न केला, असा आरोप तरुणाने केला आहे. तसेच, महिलेने तरुणाची खासगी छायाचित्रे समाजमाध्यमांवर प्रसारित करण्याची धमकी देऊन त्याच्याकडे दोन लाख रुपयांची खंडणी मागितली.
त्यानंतर सातत्याने महिला तक्रारदार यांच्याकडे पैशांची मागणी करत त्रास देत होती.अखेर महिलेच्या धमकीमुळे घाबरलेल्या तरुणाने अखेर कोथरूड पोलीस ठाण्यात तक्रार दाखल केली. या महिलेविरुद्ध यापूर्वीही अशा प्रकारचे गुन्हे दाखल आहेत का, तसेच तिने अशाच पद्धतीने आणखी काही जणांची फसवणूक केली आहे का, या दिशेने पोलीस तपास करत आहेत. या प्रकरणाचा पुढील तपास कोथरूड पोलीस ठाण्याच्या महिला पोलीस उपनिरीक्षक करिश्मा शेख करत आहेत.






















