मुंबई येथील 125 वर्ष जुना एल्फिन्स्टन ब्रिज आज दिनांक 25 एप्रिल पासून बंद करण्यात येणार होता. परंतु येथील स्थानिक नागरिकांनी याला विरोध करत हा ब्रिज पुन्हा सुरू केला आहे. येथील स्थानिक नागरिकांची पुनर्वसन याच भागात केले जावे अशी मागणी केली होती. त्या
?
यावेळी स्थानिकांनी जोरदार घोषणाबाजी करत काम बंद पाडले. इथे असलेला ‘पूल बंद’चा फलक या आंदोलकांनी काढून टाकला. एल्फिन्स्टन जवळ राहणाऱ्या नागरिकांच्या पुनर्वसनाचा प्रश्न आधी सोडवला गेला पाहिजे. तसेच पूर्व पश्चिम जाण्यासाठी पादचारी पुलाचे काम आधी पूर्ण करा मगच हा पूल पूर्णतः बंद करा अशी मागणी स्थानिक रहिवाशांकडून केली जात आहे. हा रस्ता बंद केल्यास आंदोलन अधिक तीव्र करु असा इशारा स्थानिकांकडून देण्यात येत आहे. या ठिकाणी पिढ्यानपिढ्या अनेक कुटुंब राहतात. त्यांचे पुनर्वसन न करताच हा पूल पाडण्यात येत असल्याचा आरोप स्थानिकांनी केला.
परेल व प्रभादेवी रेल्वे स्थानकावरील पूर्व – पश्चिमेला जोडणारा एलफिन्स्टन ब्रिज तोडून त्याठिकाणी नवीन ब्रिज तसेच शिवडी-वरळी एलिव्हेटेड कनेक्टर उड्डाणपुलाचे काम मुंबई महानगर प्रादेशिक विकास प्राधिकरणामार्फत करण्यात येणार आहे. या कामासाठी एलफिन्स्टन ब्रिजमार्गे जाणारी वाहतूक तात्पुरत्या स्वरूपात बंद करण्याचा निर्णय वाहतूक पोलिसांनी घेतला आहे. रहिवाशी आणि प्रवाशांची गैरसोय टाळण्यासाठी वाहतूक विभागाने नागरिकांकडून सूचना मागवल्या होत्या. त्यानुसार बुधवारी वाहतूक विभागाने अधिसूचना जारी करत एलफिन्स्टन ब्रिज बंद करण्याचा निर्णय घेतला होता. परंतु नागरिकांनी यास विरोध करत ब्रिज सुरू केला आहे.
दरम्यान, परेल व प्रभादेवी परिसरातील नागरिकांना आपत्कालीन परिस्थितीमध्ये रुग्णालयात जाण्या व येण्यासाठी मुंबई महानगर विकास प्राधिकरणामार्फत दोन रुग्णवाहिकांची सोय करण्यात आलेली आहे. एक रुग्णवाहिका प्रभादेवी रेल्वे स्थानक पश्चिम रेल्वे पादचारी पूल येथे व दुसरी रूग्णवाहिका परेल रेल्वे स्थानक पूर्व येथे उपलब्ध करून देण्यात आलेली आहे. तसेच या रुग्णवाहिकेसोबत रुग्णांकरिता व्हिलचेअरची व्यवस्था करण्यात आलेली आहे.
