केंद्रीय कृषी व ग्रामीण विकास मंत्री शिवराजसिंह चौहान म्हणाले की, मोदी सरकारचे ध्येय भारताला जगाचा अन्नदाता बनवणे आहे. या दिशेने सतत काम केले जात आहे. शास्त्रज्ञांचे संशोधन व तंत्रज्ञानाच्या मदतीने आपण लवकरच उत्पादन वाढवून इतर देशांना अन्न पुरवू शकू. केंद्रीय मंत्री चौहान यांनी दिल्लीत दैनिक भास्करशी विशेष संभाषणात शेती, ग्रामीण विकास आणि राजकारण यावर सविस्तर चर्चा केली. भाजप अध्यक्षपदाच्या शर्यतीत नावाबाबत ते म्हणतात की, सध्या माझ्या मनात फक्त शेतकरी आणि गावे आहेत आणि मी वर्तमानात जगतो. या संभाषणातील ठळक मुद्दे…

कृषी २०४७ मध्ये विकसित भारतात शेती व ग्रामीण विकासाची भूमिका काय असेल?

शेती भारतीय अर्थव्यवस्थेचा कणा आहे आणि शेतकरी हा त्याचा आत्मा. ७०% लोक खेड्यांमध्ये राहतात. शेतीशिवाय भारताचा विकास होऊ शकत नाही. पंतप्रधान मोदींचे स्वप्न आपल्यासाठी वरदान आहे. गेल्या ११ वर्षांत शेतीत क्रांती झाली आहे. बुधवारीच मंत्रिमंडळाने धन-धान्य योजनेला मंजुरी दिली. दहा वर्षांत कृषी उत्पादनात ४०% पेक्षा जास्त वाढ झाली आहे. १९६६-८० मध्ये दुग्ध उत्पादनात वार्षिक वाढ ०.९ दशलक्ष टन होती, जी २०१४-२४ मध्ये १०.२ दशलक्ष टन झाली. २०२४-२५ मध्ये अन्नधान्याचे उत्पादन ३,३०९ लाख टनांपर्यंत पोहोचण्याची अपेक्षा आहे. गावांचा विकास झाला तर देशाचा विकास होईल. पंतप्रधानांना हे चांगले माहिती आहे. आम्ही याच दिशेने काम करताेय.

आपण धन-धान्य योजनेचा उल्लेख केला?

या चर्चेपूर्वी (बुधवारी) मंत्रिमंडळाने ‘प्रधानमंत्री धन-धान्य कृषी योजना’ मंजूर केली, जी २०२५-२६ पासून ६ वर्षे १०० जिल्ह्यांमध्ये राबविली जाईल. उत्पादन वाढेल, सिंचन चांगले होईल, साठवण क्षमता वाढेल. शेतकऱ्यांना सुलभ कर्ज मिळेल.

तुम्ही नैसर्गिक शेतीला कसे प्रोत्साहन देता?

खते आणि कीटकनाशकांच्या अतिरेकी वापरामुळे मातीचे आरोग्य बिघडत आहे. त्यासाठी नैसर्गिक शेती अभियान सुरू करण्यात आले आहे. आम्ही एक कोटी शेतकऱ्यांपर्यंत पोहोचू. नैसर्गिक शेतीचे प्रशिक्षण व अनुदान देऊ. १८ लाख शेतकऱ्यांना नैसर्गिक शेती करायला लावण्याचे लक्ष्य आहे.

शेतीवरील ट्रम्प करांबद्दल काय सांगाल?

शेतकऱ्यांचे हित, त्यांची आर्थिक सुरक्षा ही सर्वोच्च प्राथमिकता आहे. यावर कोणतीही तडजोड नाही.

कृषी उत्पादनात भारताचे लक्ष्य काय आहे?

एकेकाळी अमेरिकेचा पीएल-४८० हा लाल गहू खावा लागला. आज आमच्याकडे अतिरिक्त गहू आहे. ५० हजार कोटी रुपयांचा बासमती निर्यात करत आहोत. आम्ही ताे वाढवू. शास्त्रज्ञांचे संशोधन व तंत्रज्ञानाच्या मदतीने आम्ही उत्पादन वाढवू,इतर देशांना अन्न पुरवू. जगाचे अन्नदाते बनू.

नकली बियाणे आणि कीटकनाशके ही मोठी समस्या आहे का?

हा कायदा ६० च्या दशकातील आहे. निकृष्ट खते, कीटकनाशके, बियाण्यांसाठी फक्त दंड हाेताे. आम्ही नवीन कायदा आणत आहोत. त्यात आर्थिक दंडासह कठोर शिक्षेची तरतूद असेल.

पक्षाध्यक्षपदासाठी तुम्हीही चर्चेत आहात?

कसे मथळे बनतात हे माहीत नाही. कृषी व ग्रामीण विकास मंत्री म्हणून, शेतकरी माझ्या नसानसात आहे. ग्रामीण विकास मंत्री म्हणून ग्रामविकास हे ध्येय आहे. मी वर्तमानातच जगताे. सांगितलेल्या कोणत्याही कामात मी सर्वोत्तम याेगदान देईन.