राज्यात ‘ऑपरेशन टायगर’ यशस्वी झाल्यानंतर शिंदे गटात सामील झालेल्या सहा खासदारांनी आपापल्या मतदारसंघात जाऊन पदाधिकारी व कार्यकर्त्यांना आपली बाजू समजावून सांगण्याचा प्रयत्न केला. या राजकीय घडामोडींनंतर खासदार ओमराजे निंबाळकर यांना सोशल मीडिया आणि मतदारांच्या मोठ्या टीकेला सामोरे जावे लागले. मात्र, यावर स्पष्टीकरण देताना ओमराजे यांनी सांगितले की, केवळ मतदारसंघाचा विकास आणि जनतेला दिलेल्या आश्वासनांची पूर्तता करण्यासाठीच आपण उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा निर्णय घेतला आहे. दरम्यान, केंद्रात लवकरच मंत्रिमंडळ विस्तार होणार असल्याची जोरदार चर्चा राजकीय वर्तुळात सुरू आहे. याच पार्श्वभूमीवर, खासदार ओमराजे निंबाळकर आणि खासदार डॉ. श्रीकांत शिंदे यांनी नुकतेच एकत्र तिरुपती बालाजीचे दर्शन घेतल्याचे समोर आले आहे. विशेष म्हणजे, श्री बालाजीच्या या दर्शनासाठी या दोन्ही नेत्यांनी तब्बल 11 किलोमीटरची पायपीट केल्याची माहिती आहे. केंद्रीय मंत्रिमंडळ विस्ताराच्या पार्श्वभूमीवर झालेल्या या तिरुपती वारीमुळे राजकीय वर्तुळात नव्याने चर्चा रंगू लागल्या आहेत. केंद्रीय मंत्रिमंडळ विस्तारात वर्णी लागण्याची शक्यता वर्तवली जात असतानाच, खासदार डॉ. श्रीकांत शिंदे आणि खासदार ओमराजे निंबाळकर यांनी नुकतेच तिरुपती बालाजीचे दर्शन घेतले. विशेष म्हणजे, यासाठी या नेत्यांनी तिरुपती ते तिरुमला डोंगरापर्यंत तब्बल 11 किलोमीटरचा पायी प्रवास केला. या भक्तीपूर्ण प्रवासाचे आणि देवदर्शनाचे ‘एक्सक्लुझिव्ह’ फोटो तसेच व्हिडिओ एका वृत्तवाहिनीच्या हाती लागले आहेत. संभाव्य मंत्रिमंडळ विस्तारात या दोन्ही नेत्यांची नावे आघाडीवर असल्याने त्यांच्या या विशेष देवदर्शनाला राजकीय वर्तुळात मोठे महत्त्व प्राप्त झाले आहे. गुरुवारी रात्री सुरू झालेल्या या पायी प्रवासानंतर आज सकाळी सर्वांनी श्री बालाजीचे मनोभावे दर्शन घेतले. या दौऱ्यात त्यांच्यासोबत खासदार श्रीरंग बारणे, ॲड. निलेश देशमुख, चंद्रहार पाटील आणि ओमराजे यांचे बंधू हेदेखील उपस्थित होते. बालाजीच्या दर्शनानंतर या सर्व नेत्यांनी विजयवाडा येथे जाऊन कन्यका देवीचेही दर्शन घेत तिला साकडे घातले. या संपूर्ण देवदर्शनासाठी या सर्व खासदारांनी मुंबई, पुणे, तिरुपती आणि त्यानंतर विजयवाडा असा प्रदीर्घ प्रवास केला. पैलवान चंद्रहार पाटील यांनी काही खास फोटो शेअर करत या भक्तीपूर्ण प्रवासाची माहिती दिली आहे. त्यांनी दिलेल्या माहितीनुसार, 25 जून रोजी खासदार डॉ. श्रीकांत शिंदे, खासदार श्रीरंग बारणे आणि खासदार ओमराजे निंबाळकर यांच्यासह त्यांनी आंध्र प्रदेशातील तिरुपती बालाजीचे दर्शन घेतले. या सर्व नेत्यांनी रात्री 10 ते पहाटे 2.30 या वेळेत तब्बल 3800 पायऱ्या चढून जवळपास 11 किलोमीटरचे अंतर पायी पार केले आणि पहाटेच्या सुमारास श्री बालाजीचे मनोभावे दर्शन घेतले.
Source link
