मुळशी : मुळशी तालुक्यातील कुस्तीप्रेमींसाठी पर्वणी ठरणारी मुळशी केसरी कुस्ती स्पर्धा २०२५ यंदा सलग १८व्या वर्षी अधिक भव्य आणि विक्रमी स्वरूपात आयोजित करण्यात आली आहे. मुळशी केसरी प्रतिष्ठानच्या वतीने होणारी ही प्रतिष्ठित स्पर्धा रविवार, दि. १४ डिसेंबर २०२५ रोजी घोटवडे फाटा, सुंदरबन लॉन्स, ता. मुळशी, जि. पुणे येथे मोठ्या उत्साहात पार पडणार आहे.
या स्पर्धेच्या सकाळी ९ ते १२ वाजेपर्यंत वजन मोजणी होणार असून, स्पर्धेच्या यशस्वी आयोजनासाठी जय्यत तयारी करण्यात आली आहे. मुळशी केसरी प्रतिष्ठानचे संस्थापक श्री. भास्कर मोहोळ व अध्यक्ष श्री. राजेंद्रभाऊ बांदल यांच्या मार्गदर्शनाखाली ही स्पर्धा होत आहे.
महाराष्ट्र केसरीनंतर सलग सर्वाधिक वर्षे अखंड सुरू असलेली ही राज्यातील एकमेव कुस्ती स्पर्धा असल्याने मुळशी केसरीला विशेष मान मिळाला आहे. राज्यभरातील नामांकित पहलवान, प्रशिक्षक, पंच तसेच दिग्गज मान्यवरांची उपस्थिती लाभणार आहे.
आकर्षक पारितोषिकांची खैरात
स्पर्धेत ५७, ६१, ६५, ७० व ७४ किलो वजनगटांचा समावेश असून प्रत्येक गटासाठी रोख बक्षिसे व चषक देण्यात येणार आहेत.
५७ व ६१ किलो गटात प्रथम क्रमांकास ₹१५,०००, ६५ व ७० किलो गटात ₹२१,०००, तर ७४ किलो गटात ₹२५,००० रोख व चषक देण्यात येणार आहेत.
मुळशी केसरी – ग्रँड प्राईज
मुळशी केसरी विजेत्यास ₹३१,००० रोख व खरी चांदीची गदा, उपविजेत्यास ₹२१,०००, तृतीय ₹१५,००० व चतुर्थ ₹११,००० रोख व चषक देण्यात येणार आहेत. तसेच सर्व गटातील विजेत्यांना चषक, रोख बक्षिसे, चांदीची नोट, ट्रॅकसूट व आकर्षक पारितोषिके जाहीर करण्यात आली आहेत.
या कुस्ती महोत्सवात मुळशीच्या मातीतील परंपरा, लढाऊ वृत्ती व उत्सवमय वातावरणाचा संगम अनुभवता येणार असून, जास्तीत जास्त मुळशीकरांनी उपस्थित राहावे, असे आवाहन अध्यक्ष राजेंद्र बांदल यांनी केले आहे.
कुस्ती चाहत्यांसाठी हा सोहळा अविस्मरणीय ठरणार असल्याचा विश्वास आयोजकांनी व्यक्त केला आहे.
