मुळशी (हिंजवडी) : आधुनिक तंत्रज्ञानाच्या नगरीतून माणुसकीचे जिवंत उदाहरण घडले आहे. माण येथील संतोष सुभाष भोसले या युवकावर उपचारासाठी मोठ्या आर्थिक मदतीची गरज असताना, हिंजवडीचे सरपंच गणेश जांभुळकर यांनी रुग्णालयात भेट देत लाखमोलाची मदत सुपूर्द करत आपले सामाजिक भान जपले.
संतोष भोसले हे गेले १४ महिने पोटाच्या गंभीर व्याधीने त्रस्त आहेत. चार वेळा Endoscopy सर्जरी करूनही आराम न मिळाल्याने आता Pancreatitis Triple Bypass ही जटिल शस्त्रक्रिया त्यांच्यावर होणार आहे. या उपचारासाठी मोठा खर्च अपेक्षित असून कुटुंबीय आर्थिक मदतीसाठी धावपळ करत आहेत.
ही बाब सरपंच गणेश जांभुळकर यांच्या निदर्शनास येताच त्यांनी थेट रुग्णालयात जाऊन संतोष यांची भेट घेतली. “आम्ही तुमच्या सोबत आहोत” असे सांगत त्यांनी आर्थिक मदत दिली. या प्रसंगी त्यांच्या चेहऱ्यावर झळकणारी आपुलकी व दिलासा देणारी साथ रुग्ण व त्यांच्या कुटुंबीयांसाठी मोठा आधार ठरली.
जांभुळकर यांच्या या माणुसकीच्या कृतीचे माण परिसरात, तसेच हिंजवडी व मुळशी तालुक्यात सर्वत्र कौतुक होत आहे. समाजातील इतर दानशूर व्यक्तींनीही पुढे येऊन मदतीसाठी हातभार लावावा, असे आवाहन सरपंच गणेश जांभुळकर यांनी यावेळी केले.
या प्रसंगी हिंजवडीचे माजी सरपंच व विद्यमान सदस्य विशाल साखरे, मच्छिंद्र हुलावळे, सुरज जांभुळकर, प्रशांत वाघमारे, महेंद्र राजीवडे आणि इतर मित्रमंडळी उपस्थित होती.
एकीकडे राजकारणातील द्वेषाच्या बातम्या गाजत असताना, अशा माणुसकीने ओतप्रोत भरलेल्या घटनांमुळे समाजात सकारात्मकता नक्कीच वाढीस लागेल.
