पुणे : पुणेकरांसाठी एक आनंदाची बातमी आहे. पुणे मेट्रोच्या दुसऱ्या टप्प्याच्या विस्तारीकरणाला केंद्र सरकारकडून अखेर मंजुरी मिळाली आहे. केंद्रीय मंत्री मुरलीधर मोहोळ यांनी ही माहिती दिली असून, पंतप्रधान नरेंद्र मोदी यांच्या अध्यक्षतेखालील केंद्रीय मंत्रिमंडळाने या प्रस्तावाला हिरवा कंदील दाखवला आहे. या ऐतिहासिक निर्णयामुळे पुण्याच्या पूर्व-पश्चिम भागांना आता जलद आणि आधुनिक मेट्रोसेवेची जोड मिळणार आहे.
वनाज-चांदणी चौक (कॉरिडॉर 2A) आणि रामवाडी-वाघोली/विठ्ठलवाडी (कॉरिडॉर 2B) हे दोन नवे मेट्रो मार्ग या टप्प्यात समाविष्ट करण्यात आले आहेत. एकूण १२.७५ किलोमीटर लांबीच्या या प्रकल्पात १३ स्थानकं असतील, जी बावधन, कोथरूड, खराडी, वाघोली या भागांना थेट मेट्रोशी जोडणार आहेत.
मोहोळ यांनी सांगितले की, “या मंजुरीसाठी नुकतीच केंद्रीय नगरविकास मंत्री मनोहरलाल खट्टर यांची भेट घेतली होती. त्या पाठपुराव्याला यश आले आहे.” तसेच, त्यांनी पंतप्रधान नरेंद्र मोदी आणि मुख्यमंत्री देवेंद्र फडणवीस यांचे पुणेकरांच्या वतीने आभार मानले.
या नव्या मार्गांमुळे वनाज-रामवाडी या विद्यमान मेट्रो मार्गाचे प्रभावीपणे विस्तारीकरण होणार आहे. जिल्हा न्यायालय मेट्रो स्थानक हे या दोन्ही नवीन कॉरिडॉर्ससाठी इंटरचेंज पॉइंट असणार आहे, जिथे Line-1 (निगडी–कात्रज) आणि Line-3 (हिंजवडी–जिल्हा न्यायालय) यांच्याशी थेट जोड मिळेल.
या प्रकल्पामुळे IT हब, शैक्षणिक संस्था, रहिवासी व व्यावसायिक क्षेत्रांतील नागरिकांसाठी मेट्रो हा सुरक्षित, जलद आणि पर्यावरणपूरक प्रवासाचा पर्याय ठरणार आहे. विशेष म्हणजे, चांदणी चौक व वाघोली येथे आंतरशहर बससेवा मेट्रोशी जोडली जाणार आहे, ज्यामुळे मुंबई, बेंगळुरू, छत्रपती संभाजीनगरसारख्या शहरांतून येणाऱ्या प्रवाशांना मेट्रोची थेट जोड मिळणार आहे.
₹३,६२६.२४ कोटी खर्चाच्या या प्रकल्पाची अंमलबजावणी महा-मेट्रोमार्फत होणार असून, पुढील चार वर्षांत तो पूर्ण केला जाणार आहे. पुणे शहरासाठी स्मार्ट आणि मल्टीमोडल ट्रान्सपोर्ट प्रणाली उभारण्याच्या दिशेने ही एक महत्त्वाची झेप ठरणार आहे.
