मेडिकल काउन्सेलिंग कमिटीने नीट-यूजी २०२६ समुपदेशन प्रक्रियेत अनेक महत्त्वाचे बदल केले आहेत. सीट अपग्रेडचा पर्याय निवडणाऱ्या विद्यार्थ्यांना आता प्रत्येक फेरीनंतर महाविद्यालयात जाऊन हजेरी लावावी लागणार नाही. त्यांचा प्रवेश समुपदेशन प्रणालीमध्ये सुरक्षित राहील. तिसऱ्या फेरीनंतर मूळ कागदपत्रांची पडताळणी, शुल्क भरणे आणि प्रवेशाची औपचारिकता पूर्ण करण्यासाठी महाविद्यालयात उपस्थित राहावे लागेल.

विद्यार्थ्यांना आता वाटप झालेली सीट ऑनलाइन पद्धतीने सोडण्याची सुविधाही दिली आहे. एनआरआय कोट्यातील उमेदवारांना आवश्यक कागदपत्रे थेट पोर्टलवर अपलोड करता येईल. नीट-यूजी समुपदेशन लवकरच सुरू होण्याची शक्यता आहे. दरम्यान, केंद्रीय आरोग्यमंत्री जे. पी. नड्डा यांनी नीट-यूजी २०२६ समुपदेशनाच्या तयारीचा आढावा घेत प्रक्रिया पारदर्शक, निष्पक्ष, गुणवत्ताधारित ठेवण्याचे निर्देश दिले.

सीबीआयचे आरोपपत्र : पेपरफुटीचा सुगावा लागू नये, असा कट होता

सीबीआयच्या पहिल्या आरोपपत्रानुसार नीट-यूजी २०२६चा पेपरफुटी कट मर्यादित स्तरावर राबवला होता. जेणेकरून डिजिटल पुरावा उरणार नाही. एनटीएचे तीन विषयतज्ज्ञ निवडक विद्यार्थ्यांकडून प्रश्न लिहून घेत होते. प्रश्नपत्रिका डिजिटल माध्यमातून पाठवली नव्हती. त्यानंतर आरोपी मनीषा वाघमारे हिने दोन विद्यार्थ्यांकडून लक्षात ठेवलेले प्रश्न पुन्हा लिहून घेत संपूर्ण प्रश्नपत्रिका तयार केली. तिच्या छापील प्रती तयार करून अनेकांना विकण्यात आल्या. ही प्रश्नपत्रिका पुणे, नाशिक व टेलिग्रामच्या माध्यमातून राजस्थानपर्यंत पोहोचली. याच डिजिटल ट्रेलच्या आधारे तपास यंत्रणांनी रॅकेटचा माग काढला.