देश-विदेश : भारतात १६ प्रकरणांतील दहशतवादी हॅपी पासिया ऊर्फ हरप्रीत सिंहला अमेरिकेत अटक केली. कॅलिफोर्नियातील सॅक्रामेंटो शहराबाहेरील भागात अमेरिकन तपास संस्था एफबीआयने हॅप्पीला छापा टाकून अटक केली. या कारवाईत एफबीआयसोबत यूएस इमिग्रेशन अँड कस्टम्स (आयसीई) टीमही होती. पंजाबमध्ये झालेल्या ग्रेनेड हल्ल्यांसाठी जबाबदार हॅप्पीची अटक ही भारतीय यंत्रणांसाठी एक मोठे यश आहे. राष्ट्रीय तपास संस्थेने (एनआयए) नवी दिल्लीतील अमेरिकन दूतावासात तैनात एफबीआयच्या विशेष अधिकाऱ्याला (अताशे) दहशतवादी हॅप्पी सॅक्रामेंटोमध्ये लपल्याची माहिती दिली होती. तेव्हापासून भारतीय गुप्तचर संस्था दहशतवादी हॅप्पीच्या मागावर होते.
एनआयएने दहशतवादी हॅपीला फरार घोषित केले होते. त्याच्यावर ५ लाख रुपयांचे बक्षीसही होते. पंजाब पोलिसांच्या कागदपत्रांनुसार, हॅप्पीविरुद्ध एकूण ३३ एफआयआर नोंदवले आहेत तर १० लूकआउट नोटिसा जारी केल्या आहेत. अमृतसर जिल्ह्यातील अजनाला येथील दहशतवादी हॅप्पीने एप्रिल २०२४ मध्ये गुरुदासपूरमधील पोलिस बॅरेकवर केलेला रॉकेट हल्ला व नोव्हेंबर २०२४ मध्ये उर्वरित. पान ८
कोर्टात जाऊ शकत नाही, प्रत्यार्पण नाही, थेट भारतात पाठवणार
दहशतवादी हॅपी अमेरिकेत बेकायदेशीरपणे घुसला होता. भारताच्या विनंतीवरून अमेरिकन एजन्सींनी त्याला अटक केली. तो भारतात गुन्हेगारी प्रकरणांमध्ये हवा आहे, त्यामुळे तो अमेरिकन न्यायालयात जाऊ शकत नाही. अमेरिका त्याचे प्रत्यार्पण करणार नाही, त्याला थेट भारतीय एजन्सींद्वारे हद्दपार केले जाईल. आजकाल अमेरिकेत बेकायदेशीर स्थलांतरितांना अटक होणे भारतासाठी देखील फायदेशीर ठरू शकते. भारतातील १७८ वॉन्टेड गुन्हेगारांपैकी ६५ सध्या अमेरिकेत लपून बसले आहेत. अमेरिका आणि कॅनडामधील सहज हालचाल देखील त्यांच्या पकडण्यात अडथळा ठरते. अमेरिकेत फास घट्ट झाला की हे गुन्हेगार कॅनडाला पळून जातात. तिथे त्यांना भारतविरोधी शक्तींचा पाठिंबा मिळतो. जर कॅनडामध्येही कडक कारवाई झाली तर इतर वॉन्टेड व्यक्तींच्या अटकेला गती मिळू शकते. सौ.दिव्यमराठी.
