पुणे (कोथरूड) : कोथरूडमधील डावी भुसारी कॉलनीजवळील पर्यायी रस्त्यावर साचलेल्या कचऱ्याच्या समस्येवर “शिवतेज न्यूज”ने वृत्त प्रसिद्ध करताच पुणे महापालिकेच्या सफाई विभागाने अवघ्या तीन तासांत तातडीने दखल घेतली. जेसीबी मशीनच्या सहाय्याने रस्त्यावर साचलेला संपूर्ण कचरा हटवण्यात आला.
एका बाजूला नागरिकांची तीव्र नाराजी व्यक्त करणारी बातमी प्रसिद्ध होताच महापालिकेच्या संबंधित अधिकाऱ्यांनी तत्काळ हालचाली सुरू केल्या. स्थानिक सफाई कर्मचारी आणि यंत्रणांच्या मदतीने काही तासांतच संपूर्ण परिसर स्वच्छ करण्यात आला. नागरिकांनी “शिवतेज न्यूज”च्या आणि स्थानिक लोकप्रतिनिधींच्या पाठपुराव्याबद्दल समाधान व्यक्त करत आभार मानले.
परिसरातील नागरिकांनी सांगितले की, “आम्ही गेल्या कित्येक महिन्यांपासून मागणी करत होतो, पण ‘शिवतेज न्यूज’ने आवाज उठवल्यानंतर लगेचच कारवाई झाली. त्यामुळे आम्हाला आता थोडा दिलासा मिळाला आहे.”
महापालिकेने येथून पुढे नियमित साफसफाई व्हावी आणि कचरा टाकणाऱ्यांवर कडक कारवाई करावी, अशी नागरिकांची मागणी अजूनही कायम आहे.
