लखनऊ सुपर जायंट्स (LSG) चा गोलंदाज दिग्वेश राठी याला त्याच्या सामना शुल्काच्या ५० टक्के दंड ठोठावण्यात आला आहे. सोमवारी लखनऊच्या एकाना क्रिकेट स्टेडियमवर सनरायझर्स हैदराबाद (SRH) विरुद्धच्या सामन्यादरम्यान आयपीएलच्या आचारसंहितेचे उल्लंघन केल्याबद्दल ही कारवाई करण्यात आली. सामन्याच्या आठव्या षटकाच्या तिसऱ्या चेंडूवर मोठा शॉट खेळण्याचा प्रयत्न करत असताना अभिषेक शर्मा शार्दुल ठाकूरच्या गोलंदाजीवर झेलबाद झाला. दिग्वेश राठीने चेंडू ऑफ स्टंपच्या बाहेर टाकला.

अभिषेक कव्हरकडे शॉट खेळला आणि शार्दुल ठाकूरने एक शानदार झेल घेतला. बाद झाल्यानंतर दिग्वेश राठीने नोटबुक सेलिब्रेशन केले आणि अभिषेक शर्माला बाहेरचा रस्ता दाखवला. यानंतर अभिषेक परत आला आणि दोघांमध्ये वाद सुरू झाला. मग पंचांनी हस्तक्षेप केला आणि दोघांनाही थांबवले. याचा एक व्हिडिओ व्हायरल होत आहे. ज्यामध्ये अभिषेक राठीला “मी तुझे केस पकडून तुला मारेन” असे म्हणतपॅव्हेलीयनकडे परतताना दिसला.

हंगामात तिसऱ्यांदा नियम मोडले

या हंगामात दिग्वेशने केलेले हे तिसरे लेव्हल १ चे उल्लंघन (कलम २.५) आहे, ज्यासाठी त्याला दोन डिमेरिट पॉइंट्स मिळाले आहेत. यापूर्वी, त्याला १ एप्रिल २०२५ रोजी पंजाब किंग्जविरुद्ध एक डिमेरिट पॉइंट आणि ४ एप्रिल २०२५ रोजी मुंबई इंडियन्सविरुद्ध दोन डिमेरिट पॉइंट मिळाले होते. आता त्याचे एकूण पाच डिमेरिट पॉइंट झाले आहेत, ज्यामुळे त्याला एका सामन्यासाठी निलंबित करण्यात आले आहे.

दिग्वेश आता २२ मे २०२५ रोजी अहमदाबाद येथे होणाऱ्या गुजरात टायटन्स विरुद्ध एलएसजीच्या पुढील सामन्यात खेळू शकणार नाही. लेव्हल १ च्या उल्लंघनांसाठी मॅच रेफरीचा निर्णय अंतिम आणि बंधनकारक असतो. दरम्यान, सनरायझर्स हैदराबादचा अष्टपैलू खेळाडू अभिषेक शर्मालाही त्याच सामन्यादरम्यान आयपीएल आचारसंहितेचे उल्लंघन केल्याबद्दल त्याच्या सामना शुल्काच्या २५ टक्के दंड ठोठावण्यात आला आहे.