आजोबा म्हणाले, ‘‘अगदी बरोबर अनुभवलंस तू. त्या बलाला अभिकेंद्री बल ( centripetal force) म्हणतात. वस्तूची गोलाकार हालचाल अभिकेंद्री बलामुळे होते.’’ विचारात पडलेल्या ईशानं आजोबांना पुन्हा विचारलं, ‘‘म्हणजे सगळ्या गोलाकार हालचालीत हे बल कार्य करतं? मी मेरीगो राउंडमध्ये गोल फिरते तेव्हासुद्धा?’’

आजोबा म्हणाले, ‘‘हो. इतकंच काय, आपली पृथ्वी सूर्याभोवती फिरते तेव्हासुद्धा हे बल कार्य करतं. तुम्हाला शाळेत ते अणूचं मॉडेल दाखवलं होतं, त्यातसुद्धा इलेक्ट्रॉन अणूच्या केंद्राभोवती फिरतात ते या अभिकेंद्री बलामुळे. आपल्या घड्याळात अर्धगोलाकार फिरणाऱ्या दोलकाची ( pendulum) हालचालसुद्धा अभिकेंद्री बलामुळे होते.’’ तेवढ्यात ६ वाजले. घड्याळाचा गजर झाला आणि ‘आज मेरीगो राउंडमध्ये बसून ही अभिकेंद्री बलाची गोष्ट मैत्रिणींना सांगायची.’’ असं ठरवून ईशा खेळायला पळाली.