आयपीएल 2025: आयपीएल 2025 स्पर्धेचे आता काही सामने शिल्लक राहिल्याने त्यातील रोमांच आता वाढू लागला आहे. मागील तीन वर्ष लखनऊ सुपर जाएंट्सकडून खेळणारा केएल राहुल (KL Rahul) यंदाच्या सीजनमध्ये दिल्ली कॅपिटल्सकडून खेळतोय. आतापर्यंत झालेल्या 9 सामन्यांमध्ये राहुलने 53 धावांच्या सरासरीने एकूण 371 धावा केल्या आहेत. ऑरेंज कॅपच्या रेसमध्ये तो नवव्या स्थानावर आहे.
जावयाबाबत काय म्हणाला सुनील शेट्टी :
इंडियन प्रीमिअर लीगच्या 18 व्या सीजनमध्ये केएल राहुलच्या स्फोटक फलंदाजीचं कौतुक त्याचे सासरे आणि बॉलिवूड अभिनेता सुनील शेट्टीने यांनी केले. केएल राहुल याने सुनील शेट्टीची मुलगी अभिनेत्री अथिया शेट्टी हिच्याशी 2023 मध्ये विवाह केला. मार्च 2025 मध्ये अथिया आणि राहुलला एक गोंडस मुलगी देखील झाली आहे. दिल्ली कॅपिटल्स विरुद्ध कोलकाता नाईट रायडर्सच्या सामन्यात कॉमेंट्री बॉक्समध्ये आकाश चोपडा आणि सुनील शेट्टी बोलत होते. यावेळी केएल राहुलच्या यंदाच्या सीजनमधील परफॉर्मन्सबद्दल ते दोघे बोलत होते. यावेळी सुनील शेट्टी म्हणाला की, ‘खरोखरच! राहुल चांगलं खेळतोय यात दिल्लीचा सुद्धा इम्पॅक्ट आहे आणि टीम ओनरशिपचा सुद्धा इम्पॅक्ट आहे. तुम्हाला याबाबत नक्की कळले की कारण जिथे तुम्ही कम्फर्टेबल असता, त्या माहोलमध्ये मिसळून जात. माझ्या मते हा त्याचा परिणाम आहे. मला माहितीये की यंदा तो दिल्ली कॅपिटल्समध्ये खुश आहे. टीमच्या ओनरशिप आणि बाकी खेळाडूंमुळे सुद्धा, हेच कारण आहे की ते त्याच्या परफॉर्मन्समधूनही दिसतंय.
हेही वाचा : 29 व्या मजल्यावर हिटमॅनचं घर! 300000000 रुपये किंमतीच्या या घरात काय आहे खास? पाहा Inside Photos
लखनऊ संघाच्या मालकांसोबत झाला होता वाद :
आयपीएल 2024 मध्ये केएल राहुल लखनऊ सुपर जाएंट्सकडून खेळत असताना एका सामन्यात पराभवानंतर त्याच्यात आणि संजीव गोएंका यांच्यात भर मैदानात वाद झाला होता. सामन्यात लखनऊचा पराभव झाल्यावर कर्णधार असलेल्या केएल राहुलवर टीमचे मालक संजीव गोएंका हे भडकले होते ज्याचा व्हिडीओ सोशल मीडियावर व्हायरल झाला होता. त्यानंतर केएल राहुलला आयपीएल 2025च्या मेगा ऑक्शनपूर्वी रिटेन करण्यात आले नाही. तेव्हा मेगा ऑक्शनमध्ये केएल राहुलला दिल्ली कॅपिटल्सने 14 कोटींना करारबद्ध केले.
केएल राहुलचं आयपीएल करिअर :
स्टार फलंदाज आणि विकेटकिपर केएल राहुल याने आयपीएलमध्ये आतापर्यंत 141 सामने खेळले असून आतापर्यंत तो आरसीबी, पंजाब किंग्स, लखनऊ आणि दिल्ली अशा संघांचा भाग राहिला आहे. या दरम्यान त्याने 132 इनिंगमध्ये 45.95 च्या सरासरीने 5054 धावा केल्या आहेत. आयपीएलमध्ये केएल राहुलने एकूण 40 अर्धशतक आणि चार शतक ठोकली असून यात त्याचा सर्वोत्तम स्कोअर हा 132 धावांचा आहे.
