ऑनलाइन पीएफ कसे काढायचे: आता प्रोव्हिडेंड फंड म्हणजेच PF अकाउंटमधून पैसे काढणे सोप्पे होणार आहे. कर्मचारी भविष्य निर्वाहनिधीत जमा असलेले पैसे अडचणीच्या काळात काढणे सहज आणि सोपे व्हावे यासाठी संघटनेने नियमांमध्ये अनेक मोठे बदल केले आहेत. ऑनलाइन पद्धतीने पीएफ काढायचा असेल तर इतर कागदपत्रांची आवश्यकता भासणार नाहीये. काय आहेत नियम जाणून घ्या.

आता ऑनलाइन पीएफ काढताना तुम्हाला रद्द केलेला (कॅन्सल) चेक अपलोड करावा लागणार नाही. यासाठी कंपनी किंवा नियोक्त्याची मंजुरी घ्यावी लागणार नाही. हे सोपस्कर पूर्ण करताही कर्मचाऱ्यांना पीएफ काढण्याचा अर्ज भरता येईल. त्याचबरोबर पासबुकचा फोटोही अपलोड करण्याची आता गरज नसणार. जर तुम्हाला बँक अकाउंट नंबर बदलण्याची गरज आहे तर आता आधार OPT च्या माध्यमातून तुम्ही दुसरं किंवा नवीन अकाउंट लिंक करु शकणार आहात. पीएफच्या या नियमांत बदल झाल्यामुळं लाखो पीएफ खातेधारकांना फायदा होणार आहे.

यापूर्वीची प्रक्रिया काय होती?

यापूर्वी PF काढण्यासाठी खूप कालावधी लागत होता. बँक अकाउंट चेक करण्यासाठी 3 दिवस लागत होते. तसंच, कंपनीची मंजूरी मिळण्यासाठी 13 दिवसांचा कालावधी लागत होता. मात्र आता हे नियम बदलण्यात आल्याने आणि प्रोसेस आणखी सोप्पी होणार आहे.

किती जणांना होणार फायदा

आत्तापर्यंत EPFOचे जवळपास 7.74 कोटी सदस्य आहेत. त्यापैकी 4.83 कोटी लोकांचे बँक खाते UANला लिंक आहे. जवळपास 15 लाख लोकांसाठी PF क्लेम हे मंजुरीसाठी अडकवून ठेवण्यात आले आहेत. त्याचा आता ग्राहकांना थेट फायदा होणार आहे.

सरकारने काय म्हटलं, पीएफ अकाउंटमधून पैसे काढण्यासाठी आता कोणत्याही कागदपत्रांची गरज भासणार नाही. कारण जेव्हा PF अकाउंट सुरू केलं होतं तेव्हाच बँक अकाउंट आणि आधार कार्ड लिंक झाले होते.

काय होणार फायदा

अकाउंटमधून पीएफ काढणे आता फार सोप्पं होणार आहे.

आता कोणतेही डॉक्युमेंट अपलोड करण्याची आवश्यकता नसणार

कंपनीकडून मंजुरी घेण्याची गरज नाही

ऑनालाइन अर्ज केल्यानंतर पीएफ तुमच्या खात्यात जमा होईल