पुणे ग्रामीण (वेल्हे) – पुणे जिल्ह्याचे पालकमंत्री व राज्याचे उपमुख्यमंत्री ना. अजितदादा पवार यांच्या मार्गदर्शनाखाली आणि आमदार श्री. शंकरभाऊ मांडेकर यांच्या पुढाकाराने वेल्हे तालुक्यातील अनुशंकर मंगल कार्यालय, आंबी फाटा येथे पार पडलेल्या ‘शासन आपल्या दारी’ उपक्रमास नागरिकांचा उदंड प्रतिसाद लाभला. या उपक्रमात १४०० पेक्षा अधिक लाभार्थ्यांनी सहभाग नोंदवून विविध शासकीय सेवा व योजनांचा लाभ घेतला.
मतदारसंघातील नागरिकांच्या थेट भेटी घेत, त्यांच्या समस्या जाणून घेऊन त्याचे तात्काळ निरसन व्हावे यासाठी हा उपक्रम हाती घेण्यात आल्याचे आमदार शंकरभाऊ मांडेकर यांनी सांगितले. उपक्रमादरम्यान अनेक नागरिकांनी विविध समस्यांविषयी मांडणी केली. प्रशासकीय अधिकाऱ्यांच्या उपस्थितीत त्वरित कारवाईचे निर्देश देण्यात आले. यामुळे उपस्थित नागरिकांनी समाधान व्यक्त केले.
उपक्रमात जन्म, जात, उत्पन्न, रहिवासी इत्यादी प्रमाणपत्रांचे वाटप, तसेच वृद्धापकाळ, अपंगत्व, शिष्यवृत्ती, रेशनकार्ड, किसान सन्मान योजना, पीएम आवास योजना, महात्मा फुले जनआरोग्य योजना, जल जीवन मिशन अशा अनेक योजनांचा लाभ एकाच ठिकाणी देण्यात आला. या माध्यमातून नागरिकांचे अनेक प्रशासकीय कामकाज सोपे झाले.
या कार्यक्रमाला आमदार श्री. शंकरभाऊ मांडेकर, भोर उपविभागीय अधिकारी डॉ. विकास खरात, वेल्हे उपविभागीय अधिकारी महेश हरिश्चंद्रे, वेल्हे तहसीलदार श्रीनिवास ढोणे, गटविकास अधिकारी पंकज शेळके, राष्ट्रवादी काँग्रेसचे जिल्हाध्यक्ष किरण राऊत, जिल्हा परिषदेचे माजी सदस्य अमोल नलावडे, कात्रज दूध संघाचे माजी अध्यक्ष भगवान पासलकर, अनंता दारवटकर, किर्तीताई देशमुख, सुनील जागडे, तसेच विविध विभागांचे खातेप्रमुख, आजी-माजी पदाधिकारी आणि मोठ्या संख्येने नागरिक उपस्थित होते.
हा उपक्रम म्हणजे शासनाची सेवा थेट गावकऱ्यांच्या दारी आणण्याचे प्रभावी उदाहरण ठरले. नागरिकांनी दिलेल्या प्रतिसादामुळे हा उपक्रम यशस्वी ठरल्याचे आयोजकांनी सांगितले.
