.

रिया आहिरने शनिवारी ऑनलाइन तक्रार दाखल केली असून सोमवारी सायबर सेलच्या वरिष्ठ अधिकाऱ्यांची भेट घेणार असल्याचे सांगितले आहे. सोशल मीडिया प्लॅटफॉर्मवर तिच्याविरोधात सुरू असलेल्या मोहिमेमुळे स्वतःसह कुटुंबीयांनाही मानसिक त्रास होत असल्याचे तिने नमूद केले आहे.

दादर आंदोलनानंतर ट्रोलिंग वाढल्याचा आरोप

22 जुलै रोजी मुंबईतील विद्यार्थी आंदोलनादरम्यान पोलिसांच्या ताब्यात घेतलेल्या आंदोलनकर्त्यांना घेऊन जाणारी व्हॅन रिया आहिरने अडवली होती. या घटनेचे व्हिडिओ सोशल मीडियावर मोठ्या प्रमाणात व्हायरल झाले आणि त्यानंतर ती चर्चेचा विषय ठरली.

मात्र, यानंतर सोशल मीडियावर तिच्याविरोधात सातत्याने अपमानास्पद टिप्पणी, ट्रोलिंग, बदनामी आणि ‘स्लट-शेमिंग’ केल्याचा आरोप तिने केला आहे. “सध्या हा छळ ऑनलाइन सुरू आहे; पण तो पुढे आणखी गंभीर स्वरूप धारण करू शकतो. याचा परिणाम माझ्या आई-वडिलांवर होऊ नये, अशी माझी इच्छा आहे,” असे तिने म्हटले आहे.

खोटी माहिती पसरवल्याचा दावा

रिया आहिरने काही सोशल मीडिया कंटेंट क्रिएटर्सवर गंभीर आरोप केले आहेत. काही जणांनी तिचे बिकिनीतील धूसर फोटो वापरून ती अश्लील किंवा प्रौढ स्वरूपाचा कंटेंट विकते, असा खोटा दावा केल्याचे तिने सांगितले.

तिच्या म्हणण्यानुसार, काही जणांनी ती इंस्टाग्रामवरील विशेष सदस्यत्वाद्वारे अशा प्रकारचा कंटेंट विकून लाखो रुपये कमावते, असा दिशाभूल करणारा प्रचार केला. मात्र, “माझे बँक खाते अशा कोणत्याही सदस्यत्वाशी जोडलेले नाही. अशा प्रकारच्या कंटेंटमधून मी एक रुपयाही कमावलेला नाही,” असे स्पष्टीकरण तिने दिले.

मॉर्फ केलेल्या छायाचित्रांची भीती

भविष्यात आपली छायाचित्रे मॉर्फ करून प्रसारित केली जाऊ शकतात, अशी भीतीही रिया आहिरने व्यक्त केली आहे. त्यामुळे अशा प्रकारच्या छळाला सुरुवातीलाच आळा घालण्यासाठी कायदेशीर कारवाई व्हावी, अशी तिची मागणी आहे.

“मी नागरिकांसाठी आवाज उठवला. आता माझ्याविरोधात सुरू असलेल्या अन्यायाविरोधातही मला उभे राहावे लागेल. सततचा ऑनलाइन छळ आणि बदनामी करणाऱ्यांना शिक्षा झाली पाहिजे. अशा प्रकारच्या हल्ल्यांचा सामना करणाऱ्या इतरांनीही पोलिसांकडे तक्रार करण्याचे धाडस दाखवावे,” असे ती म्हणाली.

पोलिसांकडून तक्रारीची पडताळणी सुरू

रिया आहिरचे वडील राजकुमार यादव यांनी मुलीने आंदोलनात सहभाग घेतल्यानंतर काही प्रमाणात टीका होईल, अशी अपेक्षा होती. मात्र, सोशल मीडियावरील अपमानास्पद मोहिमेने मर्यादा ओलांडल्याचे त्यांनी म्हटले.

दरम्यान, मुंबई पोलीस उपायुक्त (झोन 10) दत्ता नलावडे यांनी रिया आहिरची तक्रार प्राप्त झाल्याची पुष्टी केली आहे. तक्रारीची पडताळणी सुरू असून सर्व बाबींचा अभ्यास केल्यानंतर एफआयआर नोंदवण्याबाबत योग्य निर्णय घेतला जाईल, असे त्यांनी सांगितले.

हेही वाचा…

कोण आहे पोलिसांची व्हॅन अडवणारी रिया अहिर?:27 वर्षीय मॉडेलची देशभरात चर्चा; मुंबईतील विद्यार्थी आंदोलनात ठामपणे उभी राहिली

मुंबईतील विद्यार्थी आंदोलनादरम्यान पोलिसांनी ताब्यात घेतलेल्या आंदोलकांना घेऊन जाणाऱ्या व्हॅनसमोर ठामपणे उभे राहत ती रोखणारी 27 वर्षीय मॉडेल रिया अहिर सध्या देशभरात चर्चेचा विषय ठरली आहे. शिवाजी पार्क परिसरातील या घटनेचे फोटो आणि व्हिडिओ समाजमाध्यमांवर मोठ्या प्रमाणात व्हायरल झाले असून, अनेकांनी तिच्या धाडसाचे कौतुक केले आहे. सविस्तर बातमी

मुंबईची हिंमत! आंदोलकांनी भरलेली पोलीस व्हॅन अडवणाऱ्या तरुणीचा व्हिडिओ व्हायरल, संजय राऊतांनी केली पोस्ट

नीट पेपरफुटी प्रकरणाविरोधातील विद्यार्थी आंदोलनादरम्यान दादरमध्ये घडलेल्या एका घटनेचा व्हिडिओ सोशल मीडियावर मोठ्या प्रमाणात व्हायरल झाला आहे. आंदोलकांना ताब्यात घेऊन जाणाऱ्या पोलीस वाहनासमोर एका तरुणीने उभे राहत वाहन अडवण्याचा प्रयत्न केल्याचा दावा करण्यात आला आहे. या घटनेचा व्हिडिओ शिवसेना (ठाकरे गट) खासदार संजय राऊत यांनी ‘एक्स’वर शेअर करत मुंबईची हिंमत अशी प्रतिक्रिया दिली आहे. येथे वाचा संपूर्ण बातमी