श्रीमती लक्ष्मीबाई दगडूशेठ हलवाई दत्तमंदिर ट्रस्ट आणि अखिल भारतीय त्रिपदी परिवार यांच्या वतीने १२८ व्या दत्तजयंती उत्सवाचा शुभारंभ करण्यात आला. या निमित्ताने बुधवार पेठेतील दत्तमंदिराजवळील उत्सव मंडपात प. पू. वासुदेवानंद सरस्वती टेंबे स्वामी रचित ‘घो
.
या कार्यक्रमाचे आयोजन दत्तजयंती उत्सवाच्या प्रारंभी करण्यात आले. यावेळी अखिल भारतीय त्रिपदी परिवाराचे प्रमुख चिदानंद अवधूत प. पू. बाबा महाराज तराणेकर (इंदूर), जया तराणेकर, वासुदेव निवासचे प्रधान विश्वस्त प. पू. नारायणरत्न शरदशास्त्री जोशी महाराज, देविदास जोशी, हरी मुस्तीकर, संत ज्ञानेश्वर महाराज देवस्थान आळंदीचे विश्वस्त डॉ. भावार्थ देखणे, शिरीष पाटुकले, शिरीष मोहिते आदी मान्यवर उपस्थित होते. प. पू. बाबा महाराज तराणेकर यांच्या ७५ व्या अमृतमहोत्सवानिमित्त त्यांचा विशेष सन्मान करण्यात आला.
ट्रस्टचे अध्यक्ष ॲड. शिवराज कदम जहागिरदार, कोषाध्यक्ष युवराज गाडवे, विश्वस्त ॲड. प्रताप परदेशी, डॉ. पराग काळकर, सुनील रुकारी आणि राजेंद्र बलकवडे यांनी या उत्सवाचे नियोजन केले आहे. शरदशास्त्री जोशी यांनी यावेळी बोलताना सांगितले की, वासुदेवानंद सरस्वती टेंबे स्वामी महाराज म्हणजे मानवतेची गाथा आहेत आणि त्यांच्या स्तोत्राच्या सामूहिक पाठाने त्यांचे स्मरण झाले.
प. पू. बाबा महाराज तराणेकर यांनी नमूद केले की, देशभरात अनेक दत्त मंदिरे असली तरी, श्रीमती लक्ष्मीबाई दगडूशेठ हलवाई दत्तमंदिर हे एकमेव असे मंदिर आहे, जिथे दत्त जयंतीची सुरुवात लोकमंगलवर्धक ‘घोरात्कष्टात’ च्या सहस्त्र आवर्तनाने होते. ही परंपरा अन्यत्र कुठेही नाही. ‘घोरात्कष्टात’ स्तोत्रपठण हे केवळ आपल्यासाठी नसून, आपल्या आजूबाजूच्या परिसराच्या शुद्धीकरणासाठीची एक दैवी चिकित्सा आहे.
अध्यक्ष ॲड. शिवराज कदम जहागिरदार यांनी सांगितले की, ट्रस्टचा १२८ वा दत्त जयंती उत्सव या कार्यक्रमाद्वारे सुरू झाला आहे. तब्बल १५ वर्षांपूर्वी केवळ २० ते २५ साधकांसह सुरू झालेला हा स्तोत्र पठणाचा उपक्रम आज महाराष्ट्रासह भारतातील विविध शहरांतील शाखांमध्ये आणि ऑस्ट्रेलिया, जपान, जर्मनी, ब्रिटन यांसह विविध देशांमध्ये ऑनलाइन पद्धतीनेही झाला. दत्त जयंतीच्या निमित्ताने सर्व देवता उपासकांनी एकत्र येऊन सामूहिक उपासना करावी, या उद्देशाने हे स्तोत्र पठण आयोजित करण्यात आले होते.






















