अमरावती जिल्ह्यातील नगरपालिका आणि नगरपंचायतींच्या निवडणुकांमध्ये अपक्ष उमेदवारांना सध्या निवडणूक चिन्हाविनाच प्रचार करावा लागत आहे. निवडणूक आयोगाच्या निर्देशानुसार, त्यांना २६ नोव्हेंबर रोजी चिन्हांचे वाटप केले जाईल. मात्र, त्यानंतर केवळ चारच दिवसांन
.
जिल्ह्यातील १० नगरपालिका आणि दोन नगरपंचायतींसाठी ही निवडणूक प्रक्रिया सुरू आहे. यामध्ये नगराध्यक्षांच्या १२ जागांसाठी १२७ उमेदवार, तर नगरसेवकांच्या २७८ जागांसाठी १ हजार ३२९ उमेदवार रिंगणात आहेत. २ डिसेंबर रोजी मतदान होणार असून, ३ डिसेंबरला मतमोजणीअंती निकाल जाहीर केला जाईल.
उमेदवारी अर्ज मागे घेण्याची अंतिम तारीख २१ नोव्हेंबर होती. परंतु, ज्या आठ उमेदवारांनी आपल्या अर्जांबाबत अपील दाखल केले आहे, त्यांना माघार घेण्यासाठी किंवा रिंगणात कायम राहण्यासाठी २५ नोव्हेंबरपर्यंत मुदत देण्यात आली आहे. त्यामुळे मैदानातील एकूण उमेदवारांची नेमकी संख्याही त्याच दिवशी स्पष्ट होणार आहे.
राजकीय जाणकारांच्या मते, आतापर्यंतच्या निवडणुकांमध्ये असा प्रकार घडला नव्हता. एरवी उमेदवारी अर्ज मागे घेण्याच्या दिवशीच चिन्हांचे वाटप केले जाते, ज्यामुळे उमेदवारांना चिन्हासह प्रचारासाठी पुरेसा वेळ मिळतो. मात्र, यावेळी पहिल्यांदाच एवढा मोठा कालावधी चिन्हाविना प्रचारात जात आहे. आठ उमेदवारांच्या अपीलमुळे सर्वांना वेठीस धरणे योग्य नाही, असेही जाणकारांनी म्हटले आहे.
निवडणूक आयोगाने अपीलार्थींच्या अर्जांवरील निकाल २५ नोव्हेंबरपर्यंत लावण्याचे निर्देश दिले आहेत. त्यानंतर दुसऱ्या दिवशी, म्हणजेच २६ नोव्हेंबर रोजी सर्व उमेदवारांना त्यांची निवडणूक चिन्हे मिळतील. चिन्हासह प्रचारासाठी त्यांना केवळ चार दिवसांचा कालावधी मिळणार आहे.






















