ऑटो न्यूज: दर दिवशी नव्यानं जगासमोर येणारं तंत्रज्ञान आणि त्या तंत्रज्ञानाशी सुरू असणारी स्पर्धा अनेक मोठ्या कंपन्यांपुढंही आव्हानं उभी करताना दिसत असून या साऱ्याचा सर्वाधिक परिणाम होत आहे तो म्हणजे ऑटो क्षेत्रावर. वाहन उत्पादनाच्या या क्षेत्रामध्ये अत्याधुनिक तंत्रज्ञानाच्याच साथीनं अनेक बड्या कंपन्या विकास करतानाच काही कंपन्या मात्र त्यांची रणनिती बदलून पुन्हा नव्यानं सुरूवात करण्याला प्राधान्य देत आहेत. यातीलच एक कंपनी सध्या म्हणे भारतातून हद्दपार होण्याच्या मार्गावर असल्यानं आता या कारही रस्त्यावरून दिसेनाशा होणार असल्याचीच चिन्हं पाहायला मिळत आहेत.
जपानची लोकप्रिय कार उत्पादर कंपनी निसान (Nissan Motor Co.) सध्या एका जागतिक स्तरावरील बदलांच्या प्रक्रियेत असून, स्थानिक माध्यमांच्या वृत्तानुसार जागतिक स्तरावर कंपनीकडून उत्पादनात घट करत रिकंस्ट्रक्शन प्लाननुसार अनेक फॅक्ट्री बंद करण्याचा विचार केला जात आहे. यामध्येच भारतातील काही प्लांटचाही समावेश असू शकतो असं कळतंय.
तामिळनाडूच्या ओरगडम इथं असणारा Renault-Nissan हा एकमेव प्लांट निसानच्या मॅग्नाईट या कारची निर्मिती करतो. मात्र हा प्लांटसुद्धा बंद झाल्यास भारतातून निसानचं अस्तित्वंच जवळपास संपुष्टात येणार आहे. काही वर्षं मागे गेल्यास निसान हा भारतातील एक उदयोन्मुख कार ब्रँड होता. मात्र एकाएकी या कंपनीच्या कारचा खप कमी झाला आणि प्रतिस्पर्धी कंपन्यांनी हीच संधी साधत एक मोठी झेप घेतली. त्यामुळं निसानच्या कार हळुहळू या स्पर्धेतून बाहेर होत गेल्या. इलेक्ट्रीक व्हीकल क्षेत्रातही निसानला फारसा तग धरता न आल्यानं या कंपनीवरील ग्राहकांची विश्वासार्हतासुद्धा दिवसागणिक कमी होताना दिसली.
नव्या लाँचचं काय होणार?
हल्लीच निसाननं भारतात तीन नव्या कार लाँच करण्याची घोषणा केली होती. यामध्ये कॉम्पॅक्ट SUV, एक 7-सीटर MPV आणि भारतातच तयार होणाऱ्या एका इलेक्ट्रीक एसयुव्हीचा समावेश होता. मात्र आता जर कंपनीनं भारतातील प्लांट बंद करण्याचा निर्णय घेतला तर मात्र कंपनी या सर्व योजना गुंडाळून भारतातून काढता पाय घेऊ शकते.
कंपनीत होणार मोठी नोकरकपात…
येत्या काळात निसान कंपनीकडून 500 बिलियन येन म्हणजेच 28,000 कोटी रुपयांचा उत्पादन खर्च कमी करण्याचा मानस ठेवण्यात आला आहे. ज्यामुळं जागतिक स्तरावर कंपनी 20 हजारांहून अधिक कर्मचाऱ्यांना नारळही देऊ शकते. माध्यमांमध्ये उपलब्ध असणाऱ्या माहितीनुसार फक्त भारतच नव्हे, तर अर्जेंटिना, दक्षिण आफ्रिका आणि मेक्सिकोतील प्लांटसुद्धा कंपनी बंद करण्याचा निर्णय घेऊ शकते. त्यामुळं असं झाल्यास ऑटो क्षेत्रातील ही एक मोठी घडामोड ठरेल याच वाद नाही.
