बाबिल खान व्हायरल व्हिडिओ: दिवंगत अभिनेता इरफान खानचा मुलगा बाबिल खान सध्या सोशल मीडियावर चर्चेत आहे. बाबिल खानने त्याच्या इंस्टाग्राम स्टोरीमध्ये एक व्हिडीओ शेअर केला होता. यामध्ये तो भावूक होऊन रडताना दिसत होता. इतकंच नाही तर बॉलिवूड खराब झालं आहे असं सांगताना शनाया कपूर, अनन्या पांडे, अर्जुन कपूर, सिद्धांत चतुर्वेदी आणि इतर अनेक अभिनेत्यांची नावं घेतली. वाद निर्माण झाल्यानंतर त्याने आपलं इंस्टाग्राम अकाऊंट डिलीट केलं होतं. पण नंतर त्याने ते पुन्हा सुरु केलं. बाबिलच्या कुटुंबाकडून याप्रकरणी स्पष्टीकरण देण्यात आलं असून, चुकीचा अर्थ लावण्यात आल्याचा दावा केला आहे. यादरम्यान अभिनेता हर्षवर्धन राण्ने बाबिल खान दारु आणि इतर गोष्टींपासून दूर राहण्याचा सल्ला दिला आहे.
हर्षवर्धनची बाबिलसाठी पोस्ट
बाबिलसाठी लिहिलेल्या पोस्टमध्ये हर्षवर्धन म्हणाला आहे की, “प्रिय बाबिल खान, देवाच्या कृपेने तुला अभिनयाचा वारसा मिळाला आहे. तू हा वारसा पुढे नेण्याची गरज आहे! कृपया या कलाकृतीला तुझे सर्वोत्तम दे. कार्यक्रम आणि पार्ट्यांपासून दूर राहा. जेणेकरून गरज नसणाऱ्या लोकांशी संवाद टाळता येईल.”
‘लोक तुम्हाला वाईट वागणूक देणार नाहीत जर…’
पुढे त्याने म्हटलं आहे की, “मी चित्रपट कुटुंबातील नाही. पण जर तुम्ही लोकांना परवानगी दिली नाही तर लोक तुमच्याशी वाईट वागणार नाहीत हे मी शिकलो आहे. तुम्हाला तुमच्या पायावर उभे राहण्याची’ गरज आहे. तसंच कृपया दारू आणि अशा कोणत्याही गोष्टींपासून दूर राहा. कारण उंच उभे राहण्यासाठी तुम्हाला ताकदीची आवश्यकता असते. कृपया काळजी घे”.
बाबिल खानला मोठ्या प्रमाणात मानसिक बिघाड होत आहे, त्याच्या सर्व इन्स्टाग्राम पोस्ट्स हटविल्या गेल्या आहेत-अनन्या पांडे, अर्जुन कपूर आणि संपूर्ण बॉलिवूड
pic.twitter.com/ujll4dzo4o– घर के कलेश (@गार्केलेश) 4 मे, 2025
कुटुंबावर स्पष्टीकरण देण्याची वेळ
व्हिडिओ व्हायरल झाल्यानंतर, बाबिलने तात्काळ तो डिलीट केला. इतकंच नाही तर आपलं इंस्टाग्राम अकाउंट देखील डिलीट केलं. यादरम्यान त्याच्या कुटुंबाने एक अधिकृत स्टेटमेंट जारी केलं. बाबिलच्या वक्तव्याचा विपर्यास करण्यात आल्याचा दावा यात करण्यात आला आहे. प्रत्येकाचे खराब दिवस असतात आणि बाबिलाही ते असण्याची परवानगी आहे असंही सांगण्यात आलं आहे.
“क्लिपमध्ये, बाबिल त्याच्या काही सहकारी अभिनेत्यांचं प्रामाणिकपणे कौतुक करत होता जे भारतीय चित्रपटसृष्टीच्या विकसित योगदान देत आहेत असं त्याला वाटतं. अनन्या पांडे, शनाया कपूर, सिद्धांत चतुर्वेदी, राघव जुयाल, आदर्श गौरव, अर्जुन कपूर आणि अरिजित सिंग यांचं तो कौतुक करत होता. त्यांचा प्रामाणिकपणा, आवड आणि विश्वासार्हता प्रस्थापित करण्यासाठी प्रयत्न य़ाबाबत तो उल्लेख करत होता,” असं कुटुंबाकडून सांगण्यात आलं आहे.
बाबिल हा इरफान आणि सुतापा सिकदर यांचा मुलगा आहे. त्याने काला (2022) मधून हिंदी चित्रपटसृष्टीत पदार्पण केलं. तो शेवटचा लॉगआउटमध्ये दिसला होता, जो ZEE5 वर प्रदर्शित झाला होता.
