अनया बंगार: भारताचे माजी क्रिकेटर संजय बांगर यांचा मुलगा आर्यन याने काही महिन्यांपूर्वी लिंग-बदल शस्त्रक्रिया केली असून यानंतर त्याने स्वतःची ओळख बदलली आणि आता तो आर्यनचा अनाया झाला आहे. बांगर यांच्या मुलाने परदेशात जाऊन हार्मोन रिप्लेसमेंट थेरपी आणि लिंग-बदल शस्त्रक्रिया केली, त्यानंतर तो आता मुलगी बनला असून यानंतर प्रथमच भारतात आला आहे. अनाया बांगर ही मागील काही दिवसांपासून चर्चेत असून भारतात आल्यावर ती तिचे जुने क्रिकेटर मित्र सरफराज खान आणि मुशीर खान यांच्या घरी पोहोचली. बालपणीच्या मित्रांना भेटून तिला खूप आनंद झाला आणि तिनं यासंदर्भातला व्हिडीओ सुद्धा शेअर केला आहे.
अनाया बांगर हिने सरफराज खानच्या घरी पोहोचल्यावर त्याच्या कुटुंबीयांची सुद्धा भेट घेतली आणि ते क्षण अतिशय आनंदात घालवले. तिने शेअर केलेल्या फोटोंमध्ये ती सरफराज खानच्या कुटुंबासोबत मस्ती करताना दिसली. तसेच ती आणि सरफराज दोघे थार कारच्या टपावर सुद्धा बसले होते. यासोबत अनायाने सरफराज आणि मुशीर खान सोबतचा जुना फोटो देखील शेअर केला. यात अनाया ही आर्यन होती. अनायाने फोटोला कॅप्शन देत लिहिले की, आम्ही सुरुवातीपासूनचे मित्र आहोत. आम्ही हातात फोन धरण्यापूर्वी बॅट पकडली होती. सरफराज खान याने 2025 मध्ये भारतीय संघाकडून टेस्ट क्रिकेटमध्ये पदार्पण केलं आहे. तर त्याचा भाऊ मुशीर खान हा सुद्धा देशांतर्गत क्रिकेटमध्ये चांगली कामगिरी करतोय.
मुलगी व्हायचंय कधी वाटलं?
अनाया बांगर हिने काही दिवसांपूर्वीच एक मुलाखत दिली होती. या मुलाखतीत अनायाला विचारण्यात आलं की तुला कधी वाटलं की आपण चुकीचं लिंग निवडलं आहे? यावर अनाया म्हणाली, ‘जेव्हा मी आठ नऊ वर्षांची होते तेव्हा आईच्या कपाटातून तिचे कपडे चोरून घालायचे. मग आरशात पाहून म्हणायचे की मी मुलगी आहे आणि मला मुलगी व्हायचंय. मी मुशीर खान, सरफराज खान, यशस्वी जयस्वाल यांसारख्या युवा क्रिकेटर्स सोबत क्रिकेट खेळलं आहे. मला स्वतःबद्दल गुप्तता पाळावी लागली कारण माझे बाबा क्रिकेटर होते’.
माजी क्रिकेटर्सने पाठवले होते अश्लील फोटो :
अनायाने पुढे म्हटले की, ‘मुलगी झाल्यावर मला समर्थन सुद्धा मिळाले आणि माझा छळ सुद्धा करण्यात आला. काही क्रिकेटर्स असेही होते ज्यांनी मला त्यांचे गलिच्छ फोटो पाठवले. अजून एक घटना तेव्हा घडली जेव्हा मी भारतात होते, मी एका जुन्या क्रिकेटरला माझ्या स्थितीबद्दल सांगितले होते. तेव्हा त्याने मला सांगितले की, चल कारमध्ये जाऊयात, मला तुझ्या सोबत झोपायचंय’. अनायाने याबाबत सांगताना कोणाचंही नाव घेतलेलं नाही परंतु एका माजी क्रिकेटरने तिच्या सोबत अशी वर्तवणूक केली होती याबातमीने क्रिकेट विश्वात खळबळ उडाली आहे.
