महाराष्ट्र (मुंबई, दि.२५) : पुणे मेट्रो रेल्वे प्रकल्पाच्या टप्पा दोन अंतर्गत वनाज ते चांदणी चौक (मार्गिका २ अ) आणि रामवाडी ते वाघोली-विठ्ठलवाडी (मार्गिका २ ब) या दोन मार्गिकांना प्रधानमंत्री नरेंद्र मोदी यांच्या अध्यक्षतेखालील केंद्रीय मंत्रिमंडळाने मंजुरी दिली आहे. या निर्णयामुळे पुणेकरांची वाटचाल अधिक गतिमान होणार आहे.
उपमुख्यमंत्री अजित पवार यांनी पंतप्रधान नरेंद्र मोदी यांच्यासह केंद्रीय मंत्रिमंडळाचे आभार मानत, या निर्णयामुळे पुण्याच्या वाहतूक व्यवस्थेतील अडचणी कमी होतील, तसेच सार्वजनिक वाहतूक, औद्योगिक, व्यापारी आणि शैक्षणिक विकासास चालना मिळेल, असा विश्वास व्यक्त केला आहे.
पुणे मेट्रो प्रकल्पातील पहिला टप्पा वणाज ते रामवाडी मार्गिकेपर्यंत मर्यादित होता. आता दुसऱ्या टप्प्यांतर्गत मंजूर झालेल्या या दोन्ही मार्गिका उन्नत स्वरूपाच्या असून त्यांची एकूण लांबी १२.७५ किमी आहे. या मार्गिकांवर १३ स्थानके असतील. या सेवेमुळे चांदणी चौक, बावधन, कोथरूड, खराडी, वाघोली परिसरातील नागरिकांना मोठा दिलासा मिळणार आहे.
या प्रकल्पासाठी एकूण ३,६२६ कोटी २४ लाख रुपयांचा खर्च अपेक्षित असून चार वर्षांच्या आत प्रकल्प पूर्ण करण्याचे उद्दिष्ट ठेवण्यात आले आहे.
अजित पवार यांनी उपमुख्यमंत्री आणि पुण्याचे पालकमंत्री म्हणून **’प्रोजेक्ट मॉनिटरींग युनिट’ (पीएमयु)**च्या माध्यमातून नियमितपणे बैठका घेऊन प्रकल्पाला गती देण्याचे काम केले. त्यांच्या सातत्यपूर्ण पाठपुराव्याला यश मिळाले असून आजही (ता. २५) त्यांनी पीएमयुची बैठक घेऊन पुण्यातील आणि राज्यातील महत्त्वाच्या विकासकामांचा आढावा घेतला. यावेळी मंत्रालयातील आणि पुण्यातील संबंधित वरिष्ठ अधिकारी उपस्थित होते.
