पुणे : भारती विद्यापीठ आर्किटेक्चर महाविद्यालय आणि मुंबई येथील क्लायमेटोरा एलएलपी यांच्या संयुक्त विद्यमाने एआयसीटीई प्रशिक्षण व शिक्षण प्रशिक्षण अकॅडमी कार्यक्रम सन २०२५-२६ अंतर्गत सहा दिवसांचा ऑनलाईन फॅकल्टी डेव्हलपमेंट प्रोग्रॅम यशस्वीपणे पार पडला.
‘हवामान कृतीसाठी अभ्यासक्रम – शाश्वत शिक्षण वातावरणाकडे वाटचाल’ या विषयावरील कार्यशाळा २२ ते २७ सप्टेंबर २०२५ या कालावधीत संपन्न झाली.
या फॅकल्टी डेव्हलपमेंट प्रोग्रॅम चा उद्देश उच्च शिक्षणाच्या अभ्यासक्रमांमध्ये हवामान बदल शिक्षण, हरित कौशल्ये आणि शाश्वततेचे तत्व समाविष्ट करण्याचे नवीन उपक्रमाचा मार्ग शोधणे हा होता. देशभरातून १३१ प्रतिनिधी या कार्यक्रमात सहभागी झाले होते. यात यांत्रिक अभियांत्रिकी, स्थापत्य अभियांत्रिकी, पर्यावरण अभियांत्रिकी, आर्किटेक्चर, शहरी नियोजन, शहरी संवर्धन, मूलभूत व जीवशास्त्र, माहिती व संप्रेषण तंत्रज्ञान, कृत्रिम बुद्धिमत्ता आणि बायोटेक्नॉलॉजी अशा विविध शाखांतील प्राध्यापक व तज्ज्ञांचा समावेश होता. या कार्यक्रमाचे समन्वयक प्राचार्य डॉ. कविता मुरूगकर, सह-समन्वयक अदिति लंके, सहयोगी प्रा. एम. आर्च व क्लायमेटोरा एलएलपीच्या व्यवस्थापकीय भागीदार श्रीमती देबदत्ता उपाध्याय उपस्थित होते.
क्लायमेटोरा एलएलपी, मुंबईस्थित संस्था ही हवामान कृती व शाश्वततेसाठी आवश्यक संसाधने, प्रशिक्षण व तांत्रिक मदत पुरवते. संस्था कार्बन व वॉटर फूटप्रिंट कॅल्क्युलेटर्स, ऑनलाइन अकॅडमी, आणि हवामान विज्ञान, डेटा विश्लेषण व धोरण यामध्ये तज्ज्ञ मार्गदर्शन पुरवते.
फॅकल्टी डेव्हलपमेंट प्रोग्रॅम दरम्यान भारत व आंतरराष्ट्रीय स्तरावरील १३ मान्यवर तज्ज्ञांनी शाश्वत शिक्षण वातावरण, हवामान प्रतिसादक्षम अभ्यासक्रम रचना आणि नवकल्पनाशील अध्यापन पद्धतींवर सत्र घेतली. याकार्यशाळेत संजय सेठ, डॉ. रिकार्डा रेडेकर, श्री स्पंदन शाह, डॉ. प्रियदर्शिनी कारवे या प्रमुख वक्त्यांनी व्याख्याने दिली. तसेच कार्बन अकाउंटिंग, ESG सेवा, हवामान विज्ञान क्षेत्रातील तज्ज्ञांनी चर्चेत सहभाग घेतला. हा फॅकल्टी डेव्हलपमेंट प्रोग्रॅम ज्ञान, सहकार्य व क्षमता विकासासाठी एक प्रभावी ठरले. सहभागी प्राध्यापकांना शैक्षणिक समृद्धीबरोबरच शाश्वततेचे सैद्धांतिक व व्यावहारिक मार्गदर्शन मिळाले. तसेच भविष्यातील हवामान आव्हानांना सामोरे जाण्यासाठी शिक्षण संस्थांना सक्षम बनवण्याचा निर्धार व्यक्त केला.
