‘मानसी’ उपक्रमांतर्गत एक हजाराहून अधिक मुलींचा सहभाग; महालक्ष्मी लॉन्समध्ये योग सादरीकरण
पुणे (कोथरूड,दि.२०) : महिलांचे जीवन खडतर असून त्यांना अनेक जबाबदाऱ्यांमधून स्वतःच्या तब्येतीकडे दुर्लक्ष करावे लागते. त्यामुळे आनंदी व निरोगी आयुष्यासाठी प्रत्येक महिलेने नियमित योगाभ्यास करणे आवश्यक आहे, असे प्रतिपादन उच्च व तंत्र शिक्षण मंत्री तथा कोथरूड मतदारसंघाचे आमदार चंद्रकांत पाटील यांनी केले.
जागतिक योग दिनाचे औचित्य साधून ‘मानसी’ या उपक्रमांतर्गत कोथरूड वस्ती भागातील मुलींसाठी आयोजित केलेल्या योग एकत्रिकरण कार्यक्रमात ते बोलत होते. महालक्ष्मी लॉन्स येथे झालेल्या या कार्यक्रमात सुमारे एक हजारहून अधिक मुलींनी सहभाग नोंदवत विविध योग प्रात्यक्षिके सादर केली.
ना. पाटील म्हणाले, “स्त्रियांच्या जीवनात मासिक पाळीपासून प्रसूती वेदना व अन्य शारीरिक व मानसिक आव्हाने असतात. या सर्वांवर मात करून त्या जबाबदाऱ्या पार पाडतात. मात्र, आरोग्याकडे होणारे दुर्लक्ष ही चिंतेची बाब आहे. योगामुळे केवळ शरीर नव्हे तर मनही संतुलित राहते, त्यामुळे योग हे महिलांच्या आरोग्यासाठी अत्यंत उपयुक्त साधन ठरते.”
या वेळी माजी नगरसेविका मोनिका मोहोळ, उद्योजिका स्मिता पाटील, भाजपा दक्षिण मंडल अध्यक्ष कुलदीप सावळेकर, माजी अध्यक्ष डॉ. संदीप बुटाला, योग गुरु मुग्धा भागवत, माजी नगरसेविका छाया मारणे आदी मान्यवर उपस्थित होते.
‘मानसी’ उपक्रमामुळे वस्ती भागातील मुलींमध्ये योगाभ्यासाबाबत आवड निर्माण झाली असून, पुढील काळात पुणे शहरातही या उपक्रमाचा विस्तार करण्यात येईल, असे ना. पाटील यांनी सांगितले.
कार्यक्रमात काही महिलांनी पारंपरिक वेशभूषेत योग सादरीकरण करत उपस्थितांची मनं जिंकली.
