मुळशी-भोर-वेल्हे : राज्याचे उपमुख्यमंत्री आणि पुणे जिल्ह्याचे पालकमंत्री अजित पवार यांच्या पुढाकारातून भोर-मुळशी-राजगड (वेल्हे) विधानसभा मतदारसंघातील विविध १४६ विकासकामांसाठी ३८ कोटी ७२ लाख रुपयांचा भरीव निधी मंजूर करण्यात आला आहे. ही माहिती आमदार शंकर मांडेकर यांनी दिली.
जिल्हा वार्षिक योजनेअंतर्गत मंजूर झालेल्या या निधीतून ग्रामीण भागातील विविध प्राथमिक गरजांवर भर देण्यात आला असून, रस्ते, गटारे, जलसंधारण, आरोग्य सुविधा, अंगणवाडी इमारती, स्मशानभूमी, ग्रामपंचायत कार्यालये यासारख्या महत्त्वाच्या कामांचा समावेश आहे.
आमदार मांडेकर म्हणाले, “२५-२६ च्या जिल्हा नियोजन समितीच्या बैठकीत झालेल्या निर्णयानुसार, या कामांसाठी निधी मंजूर झाला असून लवकरच निविदा प्रक्रिया पूर्ण करून कामांना प्रत्यक्ष सुरुवात करण्यात येईल.” त्यांनी पुढे सांगितले की, या निधीमधून भोर, मुळशी आणि वेल्हे तालुक्यांतील ग्रामस्थांच्या दैनंदिन जीवनात सकारात्मक बदल घडवण्याचे उद्दिष्ट आहे.
विभागानुसार मंजूर निधीचा तपशील पुढीलप्रमाणे –
- जनसुविधा (५४ कामे) : ₹८ कोटी २९ लाख ६० हजार
- नागरी सुविधा (३४ कामे) : ₹५ कोटी ६७ लाख ३० हजार
- ग्रामीण रस्ते (३०-५४ रस्ते – ३२ कामे) : ₹८ कोटी ३० लाख
- इतर जिल्हा मार्ग (५०-५४ रस्ते – ७ कामे) : ₹४ कोटी ५० लाख
- जलसंधारण विभाग (११ कामे) : ₹२ कोटी २० लाख ५५ हजार
- नवीन अंगणवाडी इमारत बांधकाम (५ कामे) : ₹५६ लाख २५ हजार
- प्राथमिक आरोग्य केंद्र विस्तारीकरण व देखभाल (३ कामे) : ₹८ कोटी ८९ लाख २९ हजार
या कामांमुळे ग्रामीण भागातील पायाभूत सुविधा मजबूत होतील, विकासाला चालना मिळेल आणि नागरिकांचे जीवनमान उंचावेल, असा विश्वास आमदार मांडेकर यांनी व्यक्त केला.
या निधीमुळे आगामी काळात भोर, मुळशी व वेल्हे तालुक्यांतील अनेक लांबवलेल्या किंवा प्रलंबित असलेल्या योजना मार्गी लागणार आहेत. खास करून आरोग्य सेवा आणि अंगणवाडी सुविधा उभारणीवर विशेष भर देण्यात आला आहे.
भविष्यातही मतदारसंघात अधिकाधिक विकासकामे मार्गी लावण्यासाठी प्रयत्नशील राहणार असल्याचे आमदार मांडेकर यांनी स्पष्ट केले.
