शाळेतील पहिल्या पावलांचे ठसे कागदावर उमटवले; वारजेतील रामचंद्र पाटील चौधरी शाळेत फुग्यांच्या कमानीतून, औक्षण व कुंकवाच्या साक्षीने मुलांचे जंगी स्वागत
पुणे (वारजे) : पहिल्याच दिवसाच्या शाळेच्या दारी लहानग्यांचे स्वागत फुलांच्या रंगीबेरंगी सरीत, फुग्यांच्या कमानीतून झाले… कोवळ्या चिमुकल्यांच्या छोट्याशा पावलांनी नवीन शिक्षणाच्या जगात प्रवेश घेतला तो औक्षणाच्या संस्कारासह आणि कुंकवाच्या स्पर्शाने. त्यांच्या या पहिल्या पावलांचे ठसे कागदावर उमटवून पालकांच्या हाती जपून दिले गेले. हा केवळ एक समारंभ नव्हता, तर त्यांच्या शालेय प्रवासाचा पहिला जपलेला क्षणच होता.
वारजेतील पुणे महापालिकेच्या ह.भ.प. रामचंद्र पाटील चौधरी प्राथमिक शाळा (१०१ व २०५) येथे ‘पहिलं पाऊल’ या अभिनव उपक्रमांतर्गत नवागत विद्यार्थ्यांचा आगळ्यावेगळ्या पद्धतीने सत्कार करण्यात आला. विद्यार्थ्यांच्या चेहऱ्यांवरील कुतूहल, उत्साह आणि आनंद पालकांच्या डोळ्यातून अश्रूंच्या स्वरूपात ओघळत होते.
विद्यार्थ्यांना औक्षण करण्यात आले, फुलांची शुभेच्छा, चॉकलेट व नवीन पाठ्यपुस्तक संच देण्यात आले. शाळेचा परिसर रंगीबेरंगी फुग्यांच्या कमानी, सेल्फी पॉईंट्स आणि सुशोभित दाराने या छोट्या पाहुण्यांच्या स्वागतासाठी खुलून दिसत होता.
या समारंभास महापालिकेचे स्थापत्य विभागाचे मुख्य अभियंता श्री. नंदकिशोर जगताप, वारजे- कर्वेनगर पाणीपुरवठा अभियंता सौ. अपर्णा देसाई, माजी नगरसेविका लक्ष्मी दुधाणे व सौ. वृषाली चौधरी, व्यवस्थापन समितीचे अध्यक्ष श्री. बाबासाहेब दुपारगुडे उपस्थित होते. त्यांच्या शुभेच्छांसह या कार्यक्रमास चारचाँद लागले.
येथील शाळेच्या मुख्याध्यापिका अनुराधा आगरवाल (१०१) आणि प्रतिभा बागुल (२०५) यांच्या मार्गदर्शनाखाली समारंभ अतिशय शिस्तबद्ध, उत्साहपूर्ण आणि भावपूर्ण वातावरणात पार पडला. ‘पहिलं पाऊल’ या उपक्रमाने लहानग्यांच्या शालेय जीवनाचा पहिला दिवसच त्यांच्या आणि पालकांच्या स्मरणात कायमचा जपून ठेवणारा क्षण घडवून आणला.
