पुरणमल लाहोटी अभियांत्रिकी व तंत्रशिक्षण संस्थेतील २० वर्षीय विद्यार्थी विक्रम नारायण पांचाळ याचा खून केल्या प्रकरणी शिवाजीनगर पोलिसांनी पाचवा आरोपी प्रविण विनायक कराड याला शनिवारी (दि. २१) अटक केली. दरम्यान, दुपारी त्याला न्यायालयापुढे हजर केले असता त्याने न्यायाधीशांकडे पोलिसांची तक्रार करत, पोलिसांनी आपल्याला बेदम मारहान केल्याचे सांगत न्यायालयातच शर्ट काढून दाखवला. परंतु पोलिसांनी तुला कशाने मारले असे विचारल्यावर त्याला सांगता आले नाही. त्यामुळे न्यायालयाने त्या चौघांना न्यायालयीन कोठडीत पाठवले. पुरणमल लाहोटी अभियांत्रिकी व तंत्रशिक्षण संस्था लातूर येथील तृतीय वर्षात शिक्षण घेणाऱ्या तरुणावर चाकू हल्ला करुन खून केल्याची घटना घडल्यानंतर पोलिसांनी सुरुवातीला श्रीधर पाटील, प्रणव उदगीरे, सुजल दिंडे, केदार क्षीरसागर या चौघांना अटक केली होती. त्यांना दिलेली चार दिवसांची पोलीस कोठडी शनिवारी संपल्यामुळे त्यांना आज न्यायालयात हजर करण्यात आले होते. तर पोलिस कोठडी दरम्यान मिळालेल्या नव्या माहितीच्या आधारे आणखी तीन आरोपी निष्पन्न झाले आहेत. त्यातील प्रविण विनायक कराड याला शनिवारी सकाळी अटक करण्यात आली तर अन्य दोघांचा शोध सुरू असल्याचे पोलिसांनी न्यायालयात माहिती दिली. न्यायालयीन कामकाजादरम्यान पोलिसांनी सांगितले की, आरोपी प्रविण कराड याच्या अटकेची माहिती त्याच्या वडिलांना देण्याचा प्रयत्न केला, मात्र त्यांनी ते अधिकृत पत्र स्वीकारण्यास नकार दिला. दरम्यान, न्यायालयाने सर्व बाबी तपासून आरोपींची रवानगी न्यायालयीन कोठडीत केली आहे.
Source link
