केंद्रीय आरोग्य राज्यमंत्री अनुप्रिया पटेल यांनी म्हटले आहे की, विकसित भारत @२०४७ चे उद्दिष्ट साध्य करण्यासाठी शिक्षण आणि आरोग्य हे दोन सर्वात महत्त्वाचे स्तंभ आहेत. जर लोकसंख्या सुशिक्षित असेल, पण निरोगी नसेल आणि निरोगी असेल, पण सुशिक्षित नसेल तर दोन्ही परिस्थितीत आपण लोकसंख्येच्या क्षमता आणि सामर्थ्याचा उपयोग राष्ट्रनिर्मितीसाठी करू शकत नाही. दिल्लीत आयोजित भास्कर एज्युकेशन कॉन्क्लेव्हला संबोधित करताना राज्यमंत्री म्हणाल्या की, देशात विद्यापीठे, महाविद्यालये आणि प्रीमियर संस्थांची संख्या वेगाने वाढली आहे. यामुळे लहान शहरे, निमशहरे व गावांतील तरुणांना आसपासच्या संस्थांमध्ये शिकण्याची संधी मिळत आहे. अनुप्रिया यांनी शिक्षणातील एआय वापराला भविष्यातील दिशा म्हटले. कॉन्क्लेव्हच्या तिसऱ्या सीझनची सुरुवात दैनिक भास्कर समूहाचे डेप्युटी मॅनेजिंग डायरेक्टर पवन अग्रवाल यांनी केली. यामध्ये शिक्षण, धोरण आणि उद्योग क्षेत्राशी संबंधित तज्ज्ञांनी विकसित भारत @२०४७ च्या व्हिजनवर मंथन केले. नवीन अ‍ॅक्रिडिटेशन सिस्टिम पुढच्या सत्रापासून : सहस्रबुद्धे नॅकचे चेअरमन प्रो. अनिल सहस्रबुद्धे यांनी संकेत दिले की, नॅकची नवीन अ‍ॅक्रिडिटेशन सिस्टिम पुढच्या सत्रापासून लागू केली जाऊ शकते. नवीन आराखडा अत्यंत सुटसुटीत, पारदर्शक आणि तंत्रज्ञानावर आधारित पद्धतीने तयार केला जात आहे, जेणेकरून गुणवत्तेचे मूल्यांकन विश्वसनीय होऊ शकेल. सध्याच्या ग्रेडिंग सिस्टिममध्ये समोर आलेला गैरवापर आणि अनियमिततांपासून धडा घेत नवीन मॉडेलमध्ये प्रक्रिया अधिक सोप्या, डेटा-आधारित आणि जबाबदार बनवल्या जात आहेत. एआय शिक्षण क्षेत्रातील मोठ्या बदलाचे माध्यम : विनीत जोशी उच्च शिक्षण सचिव विनीत जोशी यांनी सांगितले की, आर्टिफिशियल इंटेलिजन्स (एआय) शिक्षण व्यवस्थेत मोठे परिवर्तन घडवणारे माध्यम ठरू शकते. एआय शिक्षण अधिक इंटरअॅक्टिव्ह आणि सर्वसमावेशक बनवेल. अनेक विद्यार्थी वर्गात प्रश्न विचारण्यास कच खातात. एआयच्या मदतीने ते न घाबरता उत्तरे मिळवू शकतात. यामुळे शिक्षणाच्या दर्जात सुधारणा होईल.
Source link
