.

या नऊ घरातून चोरट्यांनी ९० ते ९५ हजारांचा ऐवज लंपास केल्याचे पोलिसांनी सांगितले आहे. विशेष म्हणजे न्यायाधीशांच्या निवासस्थान परिसरात रात्र सुरक्षेसाठी दोन ठिकाणी चार पोलिस तैनात होते. तरीही चोरट्यांनी मागील बाजूने प्रवेश करुन या चोऱ्या केल्या आहेत. कांतानगर भागात एकाच परिसरात येथील जिल्हा न्यायाधीशांसह विवीध न्यायाधीशांच्या शासकिय वसाहती आहेत. त्याच वसाहतींना लागून एका न्यायालयीन कर्मचाऱ्यांची वसाहत आहे. शनिवारी मध्यरात्री अडीच ते तीन वाजताच्या सुमारास पैनगंगा इमारतीत दोन न्यायाधीशांच्या बंद घरांना चोरट्यांनी लक्ष्य करुन ते फोडले. त्यानंतर याच इमारतीपासून सुमारे १०० मीटर अंतरावर असलेल्या नल दमयंती इमारतीत दोन आणि शहानुर इमारतीत एक अशा पध्दतीने एकूण पाच न्यायाधीशांच्या घरांचे कुलूप तोडून चोरट्यांनी चोरी केली आहे. तसेच बाजुच्या इमारतीमधील कर्मचाऱ्यांचेही घरे चोरट्यांनी फोडली.

पोलिसांच्या तंबूपासून ५० फुट अंतरावरून गेले चोर पैनगंगा व इतर दोन वसाहती असलेल्या कॅम्पसमध्ये रात्रीच्या वेळी दोन पोलिस कर्तव्यावर हजर होते. पोलिसांचा तंबू ज्या ठिकाणी लावलेला आहे, त्या तंबूपासून ५० ते ६० फुट अंतरावरून चोर पैनगंगा इमारतीत शिरले आणि बाहेर निघाले. मात्र तंबूत असलेल्या दोन्ही पोलिसांना त्यांची चाहूल लागली नाही मात्र ज्यावेळी आवाज आला त्यावेळी एका पोलिसाला चोरटा भिंतींवरून उडी मारुन झाडाझुडपात जाताना दिसला मात्र पोलिस भिंतीजवळ जाईपर्यंत चोरट्यांनी पोबारा ठोकला होता. तसेच नल दमयंती आणि शहानुर यात असलेल्या कॅम्पसमध्ये गार्ड रुम समोरच्या बाजूने आहे. त्या ठिकाणी सुध्दा दोन पोलिस कार्यरत होते. मात्र चोरटे मागच्या बाजूने येवून चोरी करुन निघून गेलेत, समोर गार्डरुममधील पोलिसांना याबाबत साधी चाहूलही लागली नाही.

सुट्टीच्या दिवशी हात साफ यामध्ये एका न्यायाधीशांच्या घरातून घड्याळ, एका घरातून दहा हजारांची रोख तर काही ठिकाणाहून चांदी व सोन्याचे दागिने लंपास झाले आहेत. ज्या न्यायाधीशांच्या घरात व कर्मचाऱ्यांकडे चोरी झालेली आहेत. ते रविवारची सुटी असल्यामुळे घरी नव्हते. नेमका याच संधीचा चोरट्यांनी फायदा घेतला आहे. चोरी झाल्याची माहीती मिळताच पोलिस आयुक्त राकेश ओला यांच्यासह तिनही पोलिस उपायुक्त्, गुन्हे शाखेचे अधिकारी व पथक, गाडगेनगर ठाण्याचे पोलिस सुध्दा घटनास्थळी पोहोचले होते.