सुरत गुन्हे शाखेच्या पथकाने मानवी तस्करीच्या रॅकेटचा छडा लावत २ महिलांना अटक केली. यात छत्रपती संभाजीनगर येथून अवघ्या ७ दिवसांच्या नवजात मुलीला फसवणुकीने सुरतमध्ये आणून तिची विक्री करण्याचा प्रयत्न या महिलांनी केला होता. या प्रकरणी पोलिसांनी अंजलीबेन निर्मलभाई मिश्रा (३९, रा. रायबरेली, यूपी) आणि लक्ष्मीबाई बालाजी सोनवणे (४४, रा. छत्रपती संभाजीनगर) यांना ताब्यात घेतले असून बाळाची सुखरूप सुटका केली आहे. या प्रकरणातील दोन्ही आरोपींना चौक बाजार पोलिसांच्या ताब्यात देण्यात आले आहे. सुरतच्या वडेरोड भागातील विश्रामनगर सोसायटीमधील रांदल पार्क अपार्टमेंटमध्ये छापा टाकला. तेथे ही ७ दिवसांची मुलगी आणि दोन्ही आरोपी महिला आढळून आल्या. या महिलांनी मुलीला २ ते २.५ लाख रुपयांमध्ये विकण्याचा सौदा ठरवला होता. त्या संभाव्य ग्राहकांना मुलीचे फोटो सोशल मीडियाद्वारे पाठवत होत्या. इनसाइड स्टोरी अंजलीच्या बहिणीच्या बाळाचा जन्मावेळी मृत्यू झाला होता. यासाठी तिने आपली जुनी ओळखीची मैत्रीण लक्ष्मी हिच्यामार्फत हे बाळ मागवले होते. मात्र, ऐनवेळी बहिणीने बाळ घेण्यास नकार दिल्याने त्या मुलीला विकण्याचा निर्णय घेतला. सोनवणे हिच्याकडे रेल्वेचे तिकिटावरून हे बाळ याच संभाजीनगरचे असल्याचे निष्पन्न झाले.
Source link
