जिल्हा परिषदेची सत्ता काबीज करण्यासाठी राजकीय हालचालींना वेग आला असून, 18 जानेवारीला अध्यक्षपदासाठी विशेष सभेचे आयोजन करण्यात आले आहे. भारतीय जनता पक्षाने आपला अध्यक्ष स्वबळावर बसवण्यासाठी प्रयत्न सुरू केले आहेत. सध्या भाजपचे संख्याबळ 26 वर पोहोचले आहे. बहुमतासाठी आवश्यक असलेला 32 चा आकडा गाठण्यासाठी भाजपकडून राष्ट्रवादी काँग्रेस आणि शिवसेना (उद्धव बाळासाहेब ठाकरे) गटाच्या काही सदस्यांशी गुप्त चर्चा सुरू असल्याची माहिती विश्वसनीय सूत्रांनी दिली आहे. 2017 मध्ये भाजप सर्वात मोठा पक्ष असूनही शिवसेना आणि काँग्रेसने एकत्र येत त्यांना सत्तेपासून दूर ठेवले होते, त्या इतिहासाची पुनरावृत्ती टाळण्यासाठी भाजपने आता सावध पावले उचलण्यास सुरुवात केली आहे. जिल्हा परिषदेच्या 63 जागांपैकी भाजपचे 23 उमेदवार निवडून आले आहेत. 2 भाजप पुरस्कृत जिंकले आहेत. 2 दिवसांपूर्वी काँग्रेसच्या एका सदस्याने भाजपमध्ये प्रवेश केल्याने हे संख्याबळ आता 26 झाले आहे. मात्र, सत्तास्थापनेसाठी 6 सदस्यांची गरज आहे. हे संख्याबळ जुळवण्यासाठी भाजपने महाविकास आघाडीच्या गोटात शिरकाव करण्याचे प्रयत्न सुरू केले आहेत. विशेषतः राष्ट्रवादी आणि उबाठा गटातील काही असंतुष्ट सदस्यांना खेचण्यासाठी भाजपकडून विविध स्तरांवर चर्चा केली जात आहे. 2017 मध्ये शिवसेनेने काँग्रेसच्या मदतीने सत्ता स्थापन केली होती. मात्र, घोडेबाजार आणि फोडाफोडीच्या राजकारणाची शक्यता लक्षात घेता, आगामी काही दिवस जिल्ह्याच्या राजकारणात महत्त्वाचे ठरणार आहेत. शिंदेसेनेकडून भाजपला सहकार्याची आशा छत्रपती संभाजीनगर महापालिकेत भाजपने 115 पैकी 57 जागांवर विजय मिळवला. पक्षाला बहुमतासाठी एका सदस्याची गरज होती. त्या वेळी काही अपक्षांनी संपर्क साधल्याचे भाजपचे शहराध्यक्ष किशोर शितोळे यांनी स्पष्ट केले. त्यामुळे मनपामध्ये भाजप शिवसेनेला सोबत घेणार की नाही, असा प्रश्न समोर आला होता. स्वबळावर लढलेल्या मनपात युती होणार नाही, असे वक्तव्य पक्षाच्या राज्यपातळीवरील नेत्यांनी केल्यानंतर संभाजीनगरमध्ये भाजप सत्तेमध्ये शिंदेसेनेला वाटा देणार की नाही, याविषयी चर्चा सुरू झाली. मात्र, राज्यात युती असल्याने मनपातही एकत्र येऊ, असे पक्षाने सुरुवातीलाच जाहीर केले. त्यानंतर भाजपने मनपात उपमहापौरपद शिवसेनेला दिले. या पार्श्वभूमीवर जि. प.मध्ये मोठा पक्ष असलेल्या भाजपला शिवसेना सहकार्य करेल. मनपात सत्तेत वाटा दिल्याचा शिवसेनेला विसर पडणार नाही, अशी भाजपला अपेक्षा आहे. अध्यक्ष, सभापतिपदांसाठी ‘लॉबिंग’ जिल्हा परिषदेत सत्तास्थापनेच्या हालचाली वेगवान झाल्या असतानाच, अध्यक्ष आणि सभापतिपदाची माळ आपल्याच गळ्यात पडावी यासाठी अनेक सदस्यांनी आता पक्षश्रेष्ठींकडे मोर्चेबांधणी सुरू केली आहे. इच्छुक उमेदवारांनी मुंबईवारी वाढवली असून, आपापल्या गॉडफादरमार्फत लॉबिंग सुरू केले आहे. अनुभव आणि पक्षनिष्ठा यांचे दाखले दिले जात असून, ऐनवेळी कुणाची वर्णी लागते, याकडे सर्वांचे लक्ष आहे. भाजपकडून दबावतंत्राचा वापर भाजप मोठा पक्ष असतानाही एकनाथ शिंदे यांच्या शिवसेनेला अगोदर अडीच वर्षे अध्यक्षपद हवे आहे. भाजप पहिल्या टर्ममध्येच अध्यक्षपद घेण्यावर ठाम आहे. यामुळे भाजप आता अपक्ष आणि इतर पक्षांना सोबत घेऊन शिवसेनेवर दबावतंत्राचा वापर करत आहे. भाजपचे संख्याबळ जास्त झाल्यास शिवसेनेला कमी महत्त्वाच्या सभापतिपदांवर समाधान मानावे लागेल.
Source link
