महापालिकेच्या जुन्या कार्यालयातील जन्म व मृत्यू विभागात दाखले देण्यासाठी नागरिकांची अडवणूक होत आहे. यासंदर्भात तक्रारी आल्यानंतर समक्ष पाहणी केली असता, नागरिकांना दाखले घेण्यासाठी एजंटांचा आधार घ्यावा लागत असल्याचे व दाखल्यापोटी हजारो रुपये उकळले जात असल्याच्या तक्रारी समोर आल्या. याबाबत आयुक्तांकडेही तक्रार करण्यात आली असून, तेथील अधिकाऱ्यांच्या तत्काळ बदल्या करण्याची मागणी केली आहे. यापुढे तक्रार आल्यास अधिकाऱ्यांच्या घरात घुसून त्यांना काळे फासू, असा इशारा राष्ट्रवादी काँग्रेसचे शहर जिल्हाध्यक्ष संपत बारस्कर यांनी दिला आहे. बारस्कर यांच्यासह माजी उपमहापौर गणेश भोसले, माजी नगरसेवक प्रकाश भागानगरे यांनी सोमवारी दुपारी जन्म व मृत्यू विभागात जाऊन अधिकाऱ्यांना धारेवर धरले. दाखल्यांसाठी दहा ते पंधरा हजार रुपयांची मागणी एजंटांमार्फत होत असल्याची तक्रार नागरिकाने त्यांच्याकडे केली. काही नागरिकांची एक वर्षापासून दाखले देण्यासाठी अडवणूक केली जात आहे. मनमानी कारभार करून त्रुटी काढल्या जातात. वैतागून नागरिक एजंटांकडे जाऊन जादा पैसे देऊन दाखले मिळवतात. अधिकारी, कर्मचारी एजंटांचे साटेलोटे असल्याशिवाय हे शक्य नाही. त्यामुळे येथील अधिकाऱ्यांच्या आयुक्तांनी तत्काळ बदल्या कराव्यात, अन्यथा राष्ट्रवादी काँग्रेसकडून अधिक उग्र आंदोलन केले जाईल, असा इशारा बारस्कर यांनी दिला आहे.
Source link
