राज्यातील 29 महानगरपालिकांच्या महापौरपदासाठी आरक्षण सोडत जाहीर झाल्यानंतर मुंबईच्या महापौरपदाकडे सर्वांचे लक्ष लागले होते. कारण मुंबई महानगरपालिका ही देशातील सर्वात श्रीमंत आणि प्रभावशाली महापालिका मानली जाते. आज जाहीर झालेल्या सोडतीनुसार मुंबईचे महापौरपद हे खुल्या प्रवर्गातील महिलांसाठी राखीव करण्यात आले आहे. त्यामुळे आता मुंबईच्या पुढील महिला महापौर कोण असणार, यावर राजकीय वर्तुळात जोरदार चर्चा सुरू झाली आहे. मुंबई महापालिकेत सध्या शिवसेना-भाजप-रिपब्लिकन पक्ष अशी महायुती सत्तेत आहे. या महायुतीकडे एकूण 118 नगरसेवक असून बहुमताचा आकडा 114 आहे. त्यामुळे मुंबईचे महापौरपद महायुतीलाच मिळणार, हे जवळपास निश्चित मानले जात आहे. आरक्षण खुल्या प्रवर्गासाठी असल्याने महापौरपदावर कोणताही ओबीसी, एससी किंवा एसटी आरक्षणाचा अडसर राहिलेला नाही. मात्र हे पद महिलांसाठी राखीव असल्यामुळे महिला नगरसेविकांमधूनच महापौर निवड होणार आहे. आरक्षण सोडत जाहीर होण्यापूर्वी भाजपकडून सातत्याने महायुतीचा महापौर बसेल, असे संकेत दिले जात होते. आता आरक्षण स्पष्ट झाल्यानंतर भाजपकडून महापौरपदावर दावा करण्याची शक्यता अधिक बळावली आहे. कारण भाजपकडे मुंबईत खुल्या वर्गातील मोठ्या संख्येने महिला नगरसेविका निवडून आल्या आहेत. त्यामुळे भाजपमध्येच अनेक नावांची चर्चा सुरू झाली आहे. भाजपकडून महापौरपदासाठी ज्या महिला नगरसेविकांची नावे चर्चेत आहेत, त्यामध्ये राजश्री शिरवडकर, अलका केरकर, हर्षिता नार्वेकर, रितू तावडे, आशा मराठे आणि शितल गंभीर यांचा समावेश आहे. याशिवाय मालाडमधून मोठ्या मताधिक्क्याने विजयी झालेल्या योगिता सुनील कोळी यांचे नावही महापौरपदासाठी चर्चेत आहे. त्यांच्या विजयाला जनतेचा मोठा पाठिंबा मिळाल्याने पक्षातील वरिष्ठ नेत्यांचे लक्ष त्यांच्याकडे गेले आहे. तसेच दहिसरमधील वॉर्ड क्रमांक 2 मधून निवडून आलेल्या तेजस्वी घोसाळकर यांचेही नाव चर्चेत आहे. त्या दुसऱ्यांदा मुंबई महापालिकेत दाखल झाल्या असून मोठ्या मताधिक्क्याने विजयी झाल्या आहेत. विशेष म्हणजे त्या पूर्वी शिवसेनेत होत्या, मात्र पालिका निवडणुका जाहीर होण्याच्या काही दिवस आधी त्यांनी भाजपमध्ये प्रवेश केला आणि त्यानंतर विजय मिळवला. त्यामुळे त्यांचा राजकीय अनुभव आणि पक्षबदलाची वेळ यामुळे त्यांचे नाव अधिक चर्चेत आले आहे. यंदाच्या मुंबई महापालिका निवडणुकीत एकूण 130 महिला नगरसेविका निवडून आल्या आहेत. त्यापैकी भाजपकडे 89 पैकी 49 महिला नगरसेविका आहेत, तर उद्धव ठाकरे यांच्या शिवसेनेकडे 65 पैकी 38 महिला नगरसेविका आहेत. त्यामुळे महिलांच्या संख्येच्या बाबतीत भाजप आणि शिवसेना दोन्ही पक्ष मजबूत स्थितीत आहेत. मात्र महापौरपद महायुतीकडे असल्याने अंतिम निर्णय हा महायुतीच्या नेत्यांकडूनच घेतला जाणार आहे. पर्यायांची कमतरता नाही मुंबईच्या महापौरपदी महिला विराजमान होणार हे निश्चित असले, तरी नेमकी कोणत्या महिला नगरसेविकेला ही संधी मिळणार, यावर अजूनही सस्पेन्स कायम आहे. भाजपकडे प्रशासनाचा अनुभव असलेल्या अनेक महिला नेते असल्याने पर्यायांची कमतरता नाही. त्यामुळे पक्षातील अंतर्गत समीकरणे, महायुतीतील समन्वय आणि वरिष्ठ नेत्यांचा निर्णय यावर मुंबईच्या पुढील महिला महापौराचे नाव ठरणार आहे. मुंबईची पुढची महिला महापौर नेमकी कोण? हा एकच प्रश्न मुंबईकरांच्या दृष्टीने मात्र आता महत्त्वाचा ठरतोय.
Source link
