सुशील रहेजा नामक एका मुंबईतील बांधकाम व्यावसायिकाने मराठी तरुणाला मारहाण व शिवीगाळ केल्याची घटना समोर आली आहे. मनसेने या प्रकरणी तीव्र संताप व्यक्त करत आपल्या पद्धतीने न्याय करण्याचा इशारा दिला आहे. केंद्र राज्य व आता मुंबईतही भाजपची सत्ता आल्यामुळे रहेजा नामक बेडकांची डराव – डराव वाढली आहे, असे मनसेने म्हटले आहे. भाजपने मुंबई लगतच्या मीरा-भाईंदर महापालिकेच्या महापौरपदी एका अमराठी व्यक्तीची निवड केली आहे. मराठी एकीकरण समितीने या प्रकरणी रान पेटवले आहे. हा वाद टोकाला भिडला असतानाच आता मुंबईतील एका अमराठी बिल्डरने मराठी तरुणाला ‘तुम घाटी के लोग कशी सुधरोगे नहीं’ असे म्हणत मारहाण केल्याची घटना उजेडात आली आहे. यामुळे एकच खळबळ माजली आहे. मनसेचे नवी मुंबई अध्यक्ष गजानन काळे यांनी या घटनेवर तीव्र संताप व्यक्त केला आहे. या प्रकरणी त्यांनी सत्ताधारी भाजपवर शरसंधान साधत निर्वाणीचा इशारा दिला आहे. मनसे आपल्या पद्धतीने करेलच ते म्हणाले, “तुम घाटी लोग सुधारोगे नही” म्हणत मुंबईतील बिल्डर सुशील रहेजा याच्याकडून मराठी तरुणाला मारहाण आणि शिवीगाळ. भारतीय जनता पक्षाचा महापौर मुंबईत अजून बसला नाही, तर ही अवस्था आहे मुंबईतील मराठी माणसाची. केंद्रात, राज्यात आणि आता मुंबईत सत्ता भाजपची आल्यामुळे रहेजा नावाच्या बेडकांची डराव-डराव वाढली आहे. आता पाहूया आशिष शेलार, अमित साटम आणि देवेंद्र फडणवीस यांच्या आशीर्वादाने सुशील रहेजा तुरुंगात जातो की बाहेर राहतो. मीरा-भाईंदरला मेहता महापौर, तर मुंबईत रहेजा बिल्डरकडून मराठी तरुणाला मारहाण, या घटना सूचक नाही तर धोक्याची घंटा आहेत! असा इशारा काळेंनी दिला आहे. बाकी, रस्त्यावरचा न्याय मनसे आपल्या पद्धतीने करेलच, असा इशाराही गजानन काळे यांनी या प्रकरणी दिला आहे. मीरा भाईंदरच्या महापौरपदी डिंपल मेहता दुसरीकडे, मीरा भाईंदर महापालिकेच्या महापौरपदी भाजपच्या डिंपल मेहता यांचा 79 मतांनी विजय झाला आहे. भाजपने अमराठी चेहऱ्याला उमेदवारी जाहीर केल्याने शहरात पुन्हा एकदा मराठी अस्मितेचा मुद्दा ऐरणीवर आला आहे. या निर्णयाच्या निषेधार्थ मराठी एकीकरण समितीने आज भव्य मोर्चाचे आयोजन केले होते. पण त्यानंतरही भाजपने महापौरपदी मेहता यांची नियुक्ती केली. यामुळे हा मुद्दा पुढील काही दिवस चांगलाच गाजण्याची शक्यता आहे.
Source link
