मुळशी (खारावडे) : खारावडे येथील श्री म्हसोबा भैरवनाथ, काळूबाई व शंकर महादेव मंदिरांच्या पवित्र प्रांगणात मोफत बिगर हुंडा सामुदायिक विवाह सोहळा मोठ्या उत्साहात पार पडला. या सोहळ्यात एकूण १७ नवदांपत्यांनी एकमेकांचा जीवनसाथी म्हणून स्वीकार केला. सलग २० वर्षे सुरू असलेल्या या सामाजिक उपक्रमाचे आयोजन यंदाही श्री म्हसोबा देवस्थान ट्रस्ट आणि चंद्रकांत (अण्णा) भरेकर मित्र परिवाराच्या संयुक्त विद्यमाने करण्यात आले होते.
आयोजक चंद्रकांत अण्णा भरेकर यांनी सांगितले की, “सध्याच्या महागाईच्या युगात लग्नाचा खर्च सामान्य कुटुंबांना झेपण्यासारखा उरलेला नाही. अनेकदा प्रतिष्ठेसाठी कर्ज काढून विवाह केले जातात आणि त्यामुळे कुटुंब आर्थिक संकटात सापडतात. या पार्श्वभूमीवर २००३ पासून मुळशी तालुक्यात बिगर हुंडा सामुदायिक विवाह उपक्रमाची सुरुवात केली. या उपक्रमाला पुणे जिल्ह्यातून भरभरून प्रतिसाद मिळत आहे.”
विवाह सोहळ्यात सहभागी झालेल्या सर्व वधू-वरांना आयोजकांच्या वतीने संपूर्ण पोशाख व संसारोपयोगी भांड्यांचा संच भेट म्हणून देण्यात आला. याशिवाय, सर्व वऱ्हाडी मंडळींसाठी सुग्रास भोजनाची व्यवस्था करण्यात आली होती.
विवाह सोहळ्याचे औचित्य साधून आरोग्य चिकित्सा शिबीर व रक्तदान शिबीराचाही आयोजन करण्यात आला. आरोग्य शिबिरात १०० हून अधिक ग्रामस्थांनी सहभाग घेतला, तर १५ जणांनी रक्तदान केले. यावेळी प्राध्यापक गणेश शिंदे यांनी विवाहसंस्थेचे सामाजिक महत्त्व उलगडून सांगणारे प्रेरणादायी व्याख्यानही दिले.
या सोहळ्याला कालीपुत्र कालीचरण महाराज, माजी खासदार अशोकराव मोहोळ, आयोजक चंद्रकांत भरेकर, देवस्थान ट्रस्टच्या अध्यक्षा मधुरा भेलके, उपाध्यक्ष दिनेश जोगावडे, सचिव शंकरराव मारणे, खजिनदार लक्ष्मण मारणे, तसेच विठ्ठल भरेकर, किरण भरेकर, गणेश भरेकर, सुरेश भरेकर, दत्तात्रय मोहोळ, रमेश चोरघे, सुभाष रोकडे, विकास शिंदे आदी मान्यवर उपस्थित होते.
तालुक्यातील विविध राजकीय नेते, म्हसोबा देवस्थान ट्रस्टचे विश्वस्त, स्थानिक सरपंच, उपसरपंच व ग्रामस्थांनी मोठ्या संख्येने हजेरी लावून या सामाजिक उपक्रमाला भरभरून साथ दिली.
या उपक्रमामुळे समाजात विवाहासारख्या महत्त्वाच्या टप्प्याकडे सकारात्मक आणि समंजस दृष्टिकोनातून पाहिले जात असल्याचे चित्र खारावड्यात दिसून आले.
