मुळशी (घोटवडे) : रोकडेश्वर हनुमान जयंतीच्या निमित्ताने घोटवडे गावात पार पडलेल्या कुस्ती आखाड्याने प्रेक्षकांच्या मनात ठसा उमटवला असून, या आखाड्याने ‘घोटवडे पॅटर्न’ नावाने एक नवा आदर्श उभा केला आहे. शनिवारी १३ एप्रिल रोकडेश्वर मंदिरापासून कुस्तीला प्रारंभ झाला. ज्यांनी कुस्त्या पुरस्कृत केल्या, त्या ग्रामस्थांचा सन्मानाचा फेटा घालून मिरवणूक काढण्यात आली आणि पुढे मैदानात दिमाखात प्रवेश करण्यात आला.
या भव्य आखाड्यात एकूण ६२ कुस्त्या पार पडल्या. यामध्ये ४८ कुस्त्या चितपट, १२ गुणांच्या आधारे आणि ३ महिला कुस्त्या विशेष आकर्षण ठरल्या. मैदानात एकसंध आणि नियोजनबद्ध वातावरण होते. कुठेही गोंधळ किंवा गडबड न होता एक शिस्तबद्ध आखाडा अनुभवास आला.
या आखाड्यात सुमारे पंधरा लाख पंधरा हजार रुपये इतकी बक्षिसांची रक्कम पैलवानांना देण्यात आली. काही प्रेक्षणीय विजयांनी प्रेक्षकांची वाहवा मिळवली. पै. ओंकार दगडे, रामा कांबळे, सुजय तनपुरे, साहिल मोहोळ या पैलवानांनी आपल्या ताकदीची झलक दाखवली. शेवटची आणि बहुचर्चित कुस्ती भारत मदने विरुद्ध शुभम सिंधनाळे यांच्यात रंगली. ही कुस्ती अत्यंत चुरशीची ठरली आणि अखेर बरोबरीत सोडण्यात आली.
या संपूर्ण आयोजनामध्ये घोटवडे गावातील आजी-माजी पैलवान, ग्रामस्थ, युवक मंडळींनी एकत्र येऊन आखाड्याचे अचूक नियोजन केले. हा आखाडा आणि त्यामागील ‘घोटवडे पॅटर्न’ इतर गावांसाठीही प्रेरणादायी ठरेल असे आयोजकांनी सांगितले.
‘घोटवडे पॅटर्न’ म्हणजे काय?
- पंच म्हणून आजी-माजी पैलवानांना संधी देण्यात आली.
- निवेदकाचा माईक सुरू असताना व्यासपीठावर माईक बंद ठेवण्यात येत होता, ज्यामुळे मैदानातील आवाज स्पष्टपणे ऐकू येत होता.
- ज्यांनी कुस्ती पुरस्कृत केली, त्यांच्याच हस्ते ती कुस्ती लावण्यात आली.
- प्रायोजकांचे नाव माईकवर न घेता, पैलवानांच्या हातात थेट रोख रक्कम देण्यात आली.
- सर्व कार्यक्रम गोंधळमुक्त व अत्यंत सुस्थितीत पार पडला.
